Համավարակի ժամանակ ավելի քան 1 մլն բրիտանացի հրաժարվել է ծխելուց

Ծխելու դեմ պայքարող բրիտանական բարեգործական Action on Smoking and Health ընկերությունը տվյալներ է հրապարակել, որոնց համաձայն՝ COVID-19-ի համավարակի ընթացքում  ավելի քան 1 մլն բրիտանացի  հրաժարվել է ծխելուց. ըստ yerkir.am-ի՝ հայտնում է «Կոմերսանտ»-ը։

Հարցման մասնակցված բրիտանացիների 41 տոկոսն ասել է, որ թողել է ծխելը վերջին չորս ամսում։ Նրանք հայտարարել են, որ պատճառը կորոնավիրուսն է. վախեցել են, որ ծխելը  հիվանդանալու դեպքում կարող է բարդություններ առաջացնել։ 

Հարցումն անցկացվել է ապրիլի 15-ից հունիսի 20-ն ընկած ժամանակահատվածում՝ 10 հազար բրիտանացու շրջանում։ Ծխելուց հրաժարվելու պատճառների թվում, բացի կորոնավիրուսից, նշվել են նաև  առողջական վիճակի համար մտահոգությունները և կարանտինային միջոցառումների ու ինքնամեկուսացման պատճառով ծխախոտ ձեռք բերելու դժվարությունները։