Արթուր Դավթյանի ավելի քան 250 մլն արժեցող առանձնատունը, որը, նրա հավաստմամբ, կառուցվել է 43 մլն դրամով (ֆոտո). Politik.am

Politik.am-ը գրում է. «Այս իշխանությունները ժողովրդին մոլորեցնելու համար հաճախ են խոսում նախկիններից և նրանց դղյակներից, բայց մոռանում են այն նախկիններին, ովքեր հնազանդության երդում են տվել իրենց։

Վառ օրինակ է Գլխավոր դատախազի պաշտոնը զբաղեցնող Արթուր Դավթյանը։ Այս պաշտոնյան և նախկին է, և շքեղ դղյակ ունի, բայց համարվել և շարունակում է համարվել Փաշինյանի սիրելին։ Ավելին, Արթուր Դավթյանը այնքան է կտրվել իրականությունից, որ ինքն անձամբ է խոսում «նախկինների»  ապօրինի գույքից և վստահեցնում է, որ ինքը պայքարելու է դրա դեմ։

Հետաքրքիր է, որ այս դղյակը Արթուր Դավթյանի հավաստմամբ կառուցվել է 43 մլն դրամով։ Եվ սա այն դեպքում, երբ նույն Աջափնյակ համայնքում նույնանման առանձնատների գները կսկում են 500 հազար դոլարից և հասնում մինչև 1 մլն դոլար։ Հետաքրքիր է, թե Դավթյանն այդ ինչ շինարարական տաղանդ ունի, որ կարողանում է առնվազն 500 հազար դոլար արժեցող տունը կառուցել 85 հազար դոլարով»։