Եթե Թուրքիան դիպչի Ջուֆրայի ավիաբազային, մենք զորքեր կմտցնենք Լիբիա. եգիպտացի գեներալ

Կահիրեի Ռազմական ակադեմիայի ազգային անվտանգության պրոֆեսոր, Եգիպտոսի զինված ուժերի գեներալ-մայոր Մուհամմադ Քաշքուշը կարծում է, որ Թուրքիան մտադիր է վերահսկել Լիբիայի բոլոր հիմնական ռազմական հենակետերը: Անկարան արդեն իր վերահսկողության տակ է առել «Միտիգա» և «Ալ-Վաթիա» ավիաբազաները, ինչպես նաև ռազմական օբյեկտները հյուսիսաֆրիկյան երկրի հյուսիս-արևմուտքում գտնվող Միսուրատա նավահանգստային քաղաքում, որը Թուրքիայի համար դարձել է սիրիական զինյալներին և հարվածային համակարգերը փոխադրելու հիմնական կետը: Եգիպտոսի ռազական գործիչը նշում է, որ Թուրքիան, որը թաքնվում է Լիբիայի միջազգայնորեն ճանաչված ազգային համաձայնության կառավարության աջակցության հետևում, թիրախավորել է Ջուֆրա ավիաբազան, որը գտնվում է արաբական հանրապետության կենտրոնական մասում:

«Եթե դա հաջողվի, այն կխախտի Եգիպտոսի պաշտպանական բուֆերը (երկրի արևմտյան սահմաններում) և կօրինականացնի Եգիպտոսի ռազմական գործողությունները՝ ինքնապաշտպանության իրավունքի իրացման հարցում», - նշել է Քաշքուշը:

Քաշքուշի խոսքով՝ իսլամական գրոհայինների ներկայությունը Լիբիայում վաղուց լուրջ սպառնալիք է հանդիսանում Եգիպտոսի համար:

«Իսկ Թուրքիայի ներխուժումը Լիբիայի գործերին և նրա կողմից ջիհադական վարձկանների տեղափոխումը Սիրիայից մեր հարևան երկիր ավելի է խորացրել այդ սպառնալիքը: Ոչ ոք չի կարող մեղադրել Եգիպտոսին այն բանի համար, որ մատնանշում է ինքնապաշտպանության իր իրավունքը, որ նա կարող է դիմել ռազմական ուժի, ներառյալ ուղղակի միջամտության`իր ազգային անվտանգությունը պաշտպանելու համար: Ի վերջո, ոչ ոք չի պատրաստվում կատարել այդ խնդիրները Եգիպտոսի փոխարեն», - եզրափակել է Քաշկուշը: