ՌԴ ՊՆ հոսպիտալում անցկացվել են Covid-19-ի դեմ պատվաստանյութի առաջին փորձարկումները

ՌԴ ՊՆ Բուրդենկոյի անվան զինվորական հոսպիտալում նոր կորոնավիրուսային հիվանդության դեմ փորձնական պատվաստանյութը ներարկվել է 18 կամավորի. տեղեկացնում է yerkir.am-ը` «Իզվեստիա»-ին հղումով:

Թերթին Դդ ՊՆ-ից հայտնել են, որ երկու շաբաթ մեկուսացման մեջ գտնվող կամավորներից ընտրվել է 18 հոգանոց խումբ, որոնց այսօր` հունիսի 18-ին, պատվաստել են: Կամավորներից 9-ին ներարկվել է  պատվաստանյութի մի բաղադրիչը, 9-ին էլ` մյուսը:

Պատվաստումը տեղի է ունեցել նախկինում բազմիցս դեղամիջոցների և պատվաստանյութերի կլինիկական փորձարկումների մասնակցած` հոսպիտալի ամենափորձառու մասնագետների վերահսկողությամբ:

Պատվաստումն անցել է առանց իրադարձությունների կամ բարդությունների: Կամավորները առողջական վիճակի գանգատներ չունեն, կողմնակի երևույթներ չեն դիտարկվել: Պաշտպանական գերատեսչությունը շեշտել է, որ բոլոր կամավորները անընդհատ բժշկական հսկողության տակ են, կատարվելու են կանոնավոր սքրինինգներ, փորձանմուշներ ու անալիզներ են վերցվելու:

Մի քանի օր անց` պատվաստանյութի անվտանգության ու տանելիության մասին նախնական տվյալներ ստանալուց հետո, կկատարվի այլ կամավորների իմունացում, որոնք ներկայումս  մեկուսացված են և գտնվում են հոսպիտալի մասնագետների վերսհսկողության տակ:

Պատվաստանյութը, որը ներարկվել է կամավորներին, ավելի վաղ թեստավորվել է խոշոր և փոքր կենդանիների վրա ՌԴ ՊՆ կենտրոնական գիտահետազոտական ինստիտուտում:

Կլինիկական փորձարկումները ծրագրվում է ավարտել հուլիսին: