Հոնկոնգի գիտնականները նոր եզրույթ են շրջանառության մեջ դրել` կորոնավիրուսի գերտարածողներ

Հոնկոնգի գիտնականները նոր եզրույթ են շրջանառության մեջ դրել` կորոնավիրուսի գերտարածողներ: Ըստ նրանց` հիվանդությունը տարածում են ոչ բոլոր վարակակիրները, այլ միայն նրանց 20 տոկոսը: Վարակման մոտ 80 տոկոսի պատճառը նրանք են, մինչդեռ  վարակակիրների 70 տոկոսն ընդհանրապես չի փոխանցում վարակը շրջապատին. ըստ yerkir.am-ի` տեղեկացնում է MIGnews.com-ը:

«Գերտարածողներ ավելի հաճախ են հայտնաբերվում, քան սպասում էինք, և հիմա չենք կարող դա պատահականություն համարել»,- ասել է հետազոտության համահեղինակներից Բեն Քոուլինգը: Ըստ նրա` եթե հնարավոր լինի կանգնեցնել գերտարածումը, դա օգտակար կլինի բոլոր մարդկանց:

Բրիտանական Dailymail-ն էլ գրում է, որ բժիշկները դեռևս չեն կարողանում բացահայտել նաև կորոնավիրուսի մյուս հանելուկը` տրոմբների առաջացման պատճառը, ընդ որում` արյան մակարդուկներն ինչ-որ կոնկրետ տեղում չեն հավաքվում, օրինակ` միայն ձեռքերում կամ միայն ոտքերում: Տրոմբները տեղափոխվում են թոքերը, սիրտը կամ ուղեղը:

Փենսիլվանիայի համալսարանից Լյուիս Կապլանը The Washington Post-ին ասել է, որ առաջ նման բան չեն տեսել վարակիչ հիվանդությունների պարագայում: «Մենք հասկանում ենք, որ մակարդուկ կա, սակայն չենք հասկանում` ինչու: Մենք չգիտենք, այդ պատճառով էլ վախեցած ենք»,- նշել է նա: