Ռուսաստանն ու Թուրքիան քննարկում են Ս-400-ների նոր խմբաքանակի մատակարարման հարցը

Ռուսաստանն ու Թուրքիան բանակցություններ են վարում Ս-400 ՀՕՊ համակարգերի նոր խմբաքանակի կազմի և ժամկետների վերաբերյալ. այս մասին նշում է ՌԴ ռազմատեխնիկական համագործակցության դաշնային ծառայության տնօրեն Դմիտրի Շուգաևը. հայտնում է «ՌԻԱ Նովոստին»։

Ռուսաստանը 2019 թ. ավարտել է Թուրքիային Ս-400-ների 4 դիվիզիոնի մատակարարումը՝ 2.5 մլրդ դոլարով։ Պայմանագիրը նախատեսում է նաև ևս մեկ ամբողջական գնդային կոմպլեկտ։

«Թուրքիայի համար Ս-400-ների լրացուցիչ խմբաքանակի հարցը օրակարգում է, ոչ մի տեղ չի գնացել։ Մենք համաձայնեցնում ենք համակարգի կազմը, ժամկետներն ու այլ պայմանները։ Արդեն ընթանում է բանակցային գործընթացը և մենք հույս ունենք, որ մոտ ապագայում մենք կգանք ընդհանուր հայտարարի», - նշել է Շուգաևը։

Շուգաևն ընդգծել է, որ առաջին պայմանագիրը եղել է բացառապես մատակարարող, իսկ հաջորդ պայմանագիրը կենթադրի նաև արտադրության գործընթացում թուրքական կողմի մասնակցությունը։

Նշենք, որ ՌԴ-ն 2019 թ. արդեն Թուրքիային մատակարարել էր Ս-400-ներ։ Այդ ժամանակ լարվածություն առաջացավ ԱՄՆ-ի և Թուրքիայի միջև, որի հետևանքով Թուրքիայի նկատմամբ որոշ պատժամիջոցներ կիրառվեց։