Զերծ մնալ «գործ սարքելու» անպատվաբեր արարքից, իսկ Սոթքի հանքում առկա է հակավարակային ամեն միջոց. աշխատակից

Օրերս լրատվամիջոցներից մեկով տարածվել էր մի տեսանյութ, ըստ որի՝ Սոթքի ոսկու հանքում պատշաճորեն ջերմաչափում չի իրականացվում, խոսվեց նաև, որ ջերմաչափը կեղծ է և այլն։

Yerkir.am-ը փորձեց ստանալ որոշ պարզաբանումներ հանքի պատասխանատու աշխատակիցներից։

«Նկարահանող տվյալ անձը միտումնավոր կերպով նկարահանումն արել է այն պահին, երբ բուժքույրը փոխում է ջերմաչափի մարտկոցը, և արդյունքում թյուրիմացության մեջ է դրել հանրությանը: Նման անձանց խորհուրդ կտայինք մեջքից հարվածելու փոխարեն կամ տղամարդու պես հանդես գալ սեփական անունով ու դեմքով, կամ զերծ մնալ «գործ սարքելու» անպատվաբեր արարքից», - նշեց աշխատակիցը, ով չցանկացավ ներկայանալ։

Հանքից մեզ տեղեկացրին նաև, որ իրենք խստիվ հետևում են բոլոր կանոններին, շաբաթական օգտագործվում է մոտավորապես 5-6.000 շնչադիմակ,1000-1500 ալկոգել և ախտահանիչ նյութեր:

«Հենց այդ հետևողականության շնորհիվ է, որ այսօր Վարդենիսի Սոթքի հանքում արձանագրվել է ընդամենը մեկ վիրուսակիր, և այն էլ ոչ թե իրենց բացթողումն է եղել, այլ հայտնի բժկուհու հետ հաղորդակցման արդյունք: Մինչդեռ Վարդենիսի հիվանդանոցն ու պոլիկլինիկան զերծ չմնացին վիրուսի օջախ հանդիսանալուց», - փաստեց մեր զրուցակիցը։

Հանքի տնօրինությունը նաև սեփական միջոցների հաշվին կազմակերպում է աշխատակիցների թեստավորում: Տաս անձի պատասխանները բացասական են եղել։ Այսօր առավոտյան ևս 16 բացասական պատասխան են ստացել: