Փարիզի ամենաբնակեցված վարչական շրջանը ղեկավարելու համար կպայքարեն հայ ու թուրք թեկնածուներ

Փարիզում հաջորդ շաբաթ կայանալիք տեղական ինքնակառավարման մարմինների ընտրությունների ժամանակ մայրաքաղաքի 15-րդ վարչական շրջանի ղեկավարի պաշտոնի համար կպայքարեն ազգությամբ հայ Անուշ Թորանյանն ու ազգությամբ թուրք Ագնես Էվրենը. հայտնում է Yerkir.am-ը՝ Euronews-ի թուրքական ծառայությանը հղումով:

Նշվում է՝ Էվրենը Եվրոպական խորհրդարանի պատգամավոր է. նա նախկինում եղել է 15-րդ շրջանի ղեկավարի տեղակալ: Էվրենի ընտրվելու շանսերը բավական բարձր են գնահատվում, սակայն նրա հիմնական մրցակիցն է «Սոցիալիստական կուսակցության» անդամ Անուշ Թորանյանը:

Մանրամասնվում է, որ միևնույն կուսակցության անդամ է նաև Փարիզի գործող քաղաքապետ Անն Իդալգոն. նա ևս առաջադրված է քաղաքապետի պաշտոնի համար:

Հիշեցնենք՝ ֆրանսիական մայրաքաղաքը բաժանված է 20 վարչական շրջանի, որոնցից յուրաքանչյուրը բաժանված է 4 թաղամասի: Յուրաքանչյուր թաղամաս ունի իր ոստիկանությունը: Շրջաններից ամենաբնակելի 15-րդն է՝ ավելի քան 250 000 բնակչությամբ: