Պուրտուգալիայի նախագահն ինքնամեկուսացել է՝ երկրում կորոնավիրուսի տարածման ֆոնին

Պորտուգալիայի նախագահ Մարսելո Ռեբելու դե Սոուզը 2 շաբաթով չեղարկել է բոլոր միջոցառումները՝ երկրում կորոնավիրուսի տարածման ֆոնին. գրում է The Mercury News-ը՝ նախագահի մամուլի ծառայության հայտարարությանը հղումով. հայտնում է Yerkir.am-ը:

«Չնայած ախտանշանների բացակայությանը՝ նախագահը որոշել է 2 շաբաթով դադարեցնել իր ակտիվ գործունեությունը»:

Դա վերաբերում է նաև միջազգային այցերին:

Ըստ վերջին տվյալների՝ երկրում 30 հաստատված կորոնավիրուսակիր կա. առաջին դեպքերը գրանցվել են մարտի 2-ին:

Yerkir.am-ն ավելի վաղ տեղեկացրել էր, որ չինական Ուհան քաղաքում բռնկված ու ողջ աշխարհում տարածում գտնող անհայտ տիպի կորոնավիրուսով վարակվածների թիվն օր օրի աճում է։ Կորոնավիրուսի բռնկման մասին չինական իշխանությունները ԱՀԿ-ին տեղյակ էին պահել  դեռևս դեկտեմբերին:

Մարտի 9-ի ժամը 09.03-ի դրությամբ ողջ աշխարհում հաստատվել է կորոնավիրուսով վարակման 110.041 դեպք, որից 3825-ը՝ մահվան, և 61.982-ը՝ առողջացման:

Հիշեցնենք՝ Եվրոպայում ավելի քան 9000 հայտաբերված վարակակիր կա, որից 2/3-ը բաժին է ընկնում Իտալիային, վարակման ավելի քան 700-ական դեպքեր են գրանցվել Ֆրանսիայում և Գերմանիայում։ Առաջին անգամ կորոնավիրուս է հայտնաբերվել նաև Մոլդովայում։

Հայաստանում այս պահին կորոնավիրուսի հաստատված 1 դեպք կա: Տղամարդը Երևան էր ժամանել Թեհրանից: Այս պահին նա և օդանավում եղած մնացյալ 30 անձինք գտնվում են կարանտինում՝ Ծաղկաձորի «Գոլդեն Փելիս» հյուրանոցային համալիրում: Նրանք իրենց լավ են զգում: