Շահումյանի շրջանում մշտապես զգացվել է Դաշնակցության գործնական ներկայությունը, որը դրսևորվել է մի շարք խնդիրների լուծմամբ

Մարտի 7-ին Հայ Հեղափոխական  Դաշնակցության կողմից  ԱՀ  նախագահի թեկնածու առաջադրված Դավիթ Իշխանյանը և Ազգային ժողովի  պատգամավորության թեկնածուներ  Արթուր Մոսիյանը,  Լեռնիկ Հովհաննիսյանը  նախընտրական հանդիպումներ են ունեցել Շահումյանի շրջանի մի շարք գյուղական համայնքների և շրջկենտրոն Քարվաճառի բնակիչների հետ:  Նոր Գետաշեն, Նոր Էրքեջ, Նոր Բրաջուր, Վերինշեն համայնքների  ընտրողների հետ հանդիպումներից առաջ,  Դաշնակցության թեկնածուները նախ ծաղիկներ են խոնարհել  Արցախյան ազատամարտում  նահատակված  քաջորդիներին նվիրված  հուշակոթողներին և հարգանքի  տուրք մատուցել նրանց հիշատակին:

Ընտրողների   հետ հանդիպումների ընթացքում  թեկնածուները ներկայացրել են Դաշնակցության նախընտրական ծրագրի հիմնադրույթները, ապա անդրադարձել վերաբնակեցվող Շահումյանի շրջանին մտահոգող խնդիրներին:  Այդ համատեքստում   նախագահի թեկնածու Դավիթ Իշխանյանը նշել է, որ ըստ Դաշնակցության  տեսլականի՝ խորքային ու համակարգային  վերաբնակեցման քաղաքականության  գոտում է ընդգրկվելու  Արցախի Հանրապետության ամբողջ տարածքը:

Անդրադառնալով ճանապարհների բարեկարգման խնդրին, նախագահի թեկնածուն տեղեկացրել է, որ դեռևս պետբյուջեի քննարկման ժամանակ,   «Դաշնակցություն» խմբակցության կողմից  ներկայացրած փաթեթի հիման վրա՝   քաղաքաշինության նախարարությունում արդեն  պատրաստվել  են Վարդենիս-Քարվաճառ ավտոճանապարհի ասֆալտապատման նախագծա-նախահաշվային փաստաթղթերը:  Ըստ այդմ,  ասֆալտապատման  շինաշխատանքերի մեկնարկը նախատեսվում  էր  այս տարի, իսկ հստակ  ժամանակացույցն առայժմ  անորոշ է: Ի պատասխան Շահումյանի բնակիչների հարցադրմանը,  իր խոսքում Դ. Իշխանյանը կարևորել է նաև բնապահպանական խնդիրների լուծումները, որոնք Դաշնակցության  նախընտրական  ծրագրի համաձայն,  բնական ռեսուրսները  խնայողաբար օգտագործելու շնորհիվ հնարավորություն կընձեռեն նաև սերունդերին փոխանցել: 

Շրջանի համայնքերում բնակիչները հետաքրքրվել են նաև Դաշնակցության՝  սոցիալ-տնտեսական, կոռուպցիայի դեմ պայքարին,  կրթամշակութային,  բազմազավակ և երիտասարդ ընտանիքների աջակցության, բնակարանաշինության, ինչպես նաև Արցախյան հիմնախնդրի կարգավորմանը, այդ համատեքստում նաև ազատագրված բնակավայրերի ճակատագրին վերաբերող ծրագրերով: 

Նախագահի թեկնածու Դավիթ Իշխանյանը և պատգամավորի թեկնածուներ  Ա. Մոսիյանը, Լ. Հովհաննիսյանը  պատասխանելով ընտրողների հարցադրումներին, նշել են, որ Դաշնակցությունը  պարբերաբար հանդիպելով  բնակչության հետ, քաջատեղյակ  է հանրապետության բնակավայրերի առանձնահատկություններին ու խնդիրներին: Դրանց հիմնական լուծումը Դաշնակցությունը տեսնում է նախընտրական ծրագրում տեղ գտած դրույթի շրջանակներում, ըստ որի նախատեսվում է Արցախի բոլոր բնակավայրերի համաչափ զարգացում և ներդրումների համաչափ բաշխում:  Ինչ վերաբերում է  մասնավորապես Շահումյանի շրջանին, ապա նրա   բնակավայրերի  զարգացման վերաբերյալ  տեսլականը  հստակ  ուրվագծեր ունի: Շրջանում  առկա խնդիրները, դրանց լուծման ուղիներն ու զարգացման հնարավորությունները ուսումնասիրելու և հայեցակարգային, ռազմավարական  ծրագիր մշակելու նպատակով  Դաշնակցությունը մասնագետների ներգրավմամբ ուսումնասիրություններ է անցկացրել ու լուծման ուղիներ նախանշել:

Հանդիպումներին կայացած    անկեղծ ու անմիջական  երկխոսության  ընթացքում  ընտրողները խոստովանել են, որ Շահումյանի շրջանում մշտապես զգացվել է Դաշնակցության  գործնական ներկայությունը, որը դրսևորվել է մի շարք խնդիրների լուծմամբ.   որոշ համայնքերում  կառուցվել են դպրոցներ, լուծվել սոցիալական խնդիրներ:

Նախընտրական հանդիպման եկած  թեկնածուներին աղուհացով դիմավորեցին Քարվաճառում: Շրջկենտրոնի և հարակից գյուղերի բնակիչների համար   Դաշնակցությունը նաև  անակնկալ է մատուցել՝  կանանց տոնական միամսյակի առթիվ:  Քարվաճառի Վիլյամ Սարոյանի անվան միջնակարգ դպրոցի բակում համերգային ծրագրով է  ներկայացել  «Մենք ենք մեր սարերը» երգի-պարի պետական համույթն ու մեներգիչներ: Ռազմահայրենասիրական և ազգագրական երգ ու պարին ինքաբուխ միացան նաև  փոքրիկ քարվաճառցիները: