Կառավարությունը նախատեսում է 103.725.600 դրամ հատկացնել «Իմ քայլին», ԲՀԿ-ին, ԼՀԿ-ին, ՀՀԿ-ին և ՀՅԴ-ին

ՀՀ կառավարությունը այսօր կայանալիք նիստում նախատեսում է 103 մլն 725 հազար դրամ հատկացնել 2018 թ. դեկտեմբերի 9-ի խորհրդարանական ընտրություններում 3 և ավելի տոկոս ձայն հավաքած կուսակցություններին և դաշինքներին։ Այս մասին Yerkir.am-ը տեղեկանում է e-gov.am կայքից։

Որոշման նախագծում նշված է. «Հիմք ընդունելով «Կուսակցությունների մասին» Հայաստանի Հանրապետության սահմանադրական օրենքի համապատասխան դրույթները՝  Հայաստանի Հանրապետության վարչապետի աշխատակազմին հատկացվել են համապատասխան միջոցներ ՀՀ ազգային ժողովի ընտրություններում 3 և ավելի տոկոս ձայն հավաքած առանձին կուսակցությունների և կուսակցությունների դաշինքների աջակցություն ցույց տալու նպատակով»։

Ըստ նախագծի՝ «Իմ քայլը» դաշինքը կստանա 78 մլն 6 հազար դրամ, ԲՀԿ-ն՝ 9 մլն 150 հազար դրամ, ԼՀԿ-ն՝ 7 մլն 56 հազար դրամ, ՀՀԿ-ն՝ 5 մլն 208 հազար դրամ, ՀՅԴ-ն՝ 4 մլն 303 հազար դրամ: