2012-ին նախատեսվում է 3.9 մլրդ դրամ հատկացնել գյուղոլորտին

Գյուղատնտեսության ոլորտին 2012 թ. բյուջեի նախագծով նախատեսվում է հատկացնել 3.9 մլրդ դրամ. այսօր ԱԺ հանձնաժողովների համատեղ նիստում հայտարարել է ՀՀ ֆինանսների փոխնախարար Պավել Սաֆարյանը:

Իսկ 2012 թ. բյուջեի նախագծով բնապահպանության ոլորտին կհատկացվի 1 մլրդ 158 մլն դրամ, որը, 2011 թվականի համեմատ, ավել է 15 տոկոսով:

Ջրային պետական կոմիտեին կհատկացվի 7.1 մլրդ դրամ, որը, նախորդ տարվա համեմատ, պակաս է 700 մլն դրամով: Ֆինանսների փոխնանախարարը նաեւ ասել է, որ հատկացման նվազումը կապված է ոռոգման ծառայություն մատուցող ընկերությունների եւ ջրամատակարարման-ջրահեռացման համակարգերի հիմնանորոգման որոշ ծրագրերից հրաժարվելու պատճառով:

Նիստի ժամանակ բանավեճի առիթ է  դարձել նաեւ Մարտունիում անասունների սերմնահեղուկի պահպանման բանկին հատկացվող 5 մլն դրամը: ԱԺ պատգամավորները նշել են, որ այդ բանկում պահվող սերմնահեղուկը շուրջ 25 տարվա վաղեմություն ունի, եւ հարկավոր է նոր ծրագրեր իրականացնել:

«Տոհմային սելեկցիոն աշխատանքներ եթե չկատարենք, որեւիցե մթերատվության մասին խոսելն անիմաստ է»,- ասել է պատգամավոր Միշա Ստեփանյանը: