Վրաստանում ադրբեջանական կապիտալով գործող ավելի քան 700 ընկերություն կա

Վրաստանի էկոնոմիկայի և կայուն զարգացման նախարար Նաթիա Տուրնավան հանդիպել է Ադրբեջանի էկոնոմիկայի նախարար Միկայիլ Ջաբարովի հետ, որը պաշտոնական այցով Թբիլիսիում է. հայտնում է «Սպուտնիկ»-ի վրացական ծառայությունը:

«Այսօր Վրաստանի և Ադրբեջանի միջև տնտեսական հարաբերություններն ամենաբարձր մակարդակին են: Ավանդույթի համաձայն՝ Ադրբեջանն առաջատար է առևտրային երկկողմ հարաբերություններում: Մենք իրականացնում ենք բազմաթիվ համատեղ տնտեսական, ենթակառուցվածքային և բիզնես նախագծեր»,- նշել է Տուրնավան:

Ըստ նրա՝ Վրաստանում այսօր ադրբեջանական կապիտալով գործող ավելի քան 700 ընկերություն կա:

Հանդիպման ընթացքում քննարկվել է նաև Վրաստանի և Ադրբեջանի տարածքներով անցնող տրանսպորտային միջանցքի զարգացման ու միջազգային ճանաչման հարցը:

Ըստ «Սպուտնիկի»՝ երկրները դիվանագիտական հարաբերություններ են հաստատել 1992-ի նոյեմբերին, սերտորեն համագործակցում են երկկողմ ձևաչափով, նաև միջազգային նշանակության նախագծերի շրջանակում՝ Բաքու-Թբիլիսի-Կարս երկաթուղի, Բաքու- Թբիլիսի-Ջեյհան նավթատար և Հարավային գազային միջանցք:

Ադրբեջանը Վրաստանին ապահովում է գազով, իսկ Վրաստանից ստանում վերաարտահանվող ավտոմեքենաներ: Վրաստանը  Ադրբեջան է արտահանում նաև ծխախոտ, դեղորայք և այլ ապրանքներ: