ԲԷՑ-ը չի կարող կառավարել օֆշորային ընկերություն կամ իշխանության հետ կապ ունեցող որևէ ընկերություն. Նիկոլ Փաշինյան

Այսօր կառավարության նիստում վարչապետ Նիկոլ Փաշինյանը, օրակարգին անցնելուց առաջ, անդրադարձավ «Բարձրավոլտ էլեկտրական ցանցեր»-ին: Նրա խոսքով` հնչել են հայտարարություններ, և կառավարության դիրքորոշումը հետևյալն է` էներգետիկ ոլորտի երկու հիմնական ցանցերը չպետք է լինեն նույն սեփականատիրոջ տիրապետության տակ:

Հիշեցնենք, որ խոսքը «Տաշիր կապիտալ» ընկերության մասին է, որին արդեն պատկանում է «Հայաստանի էլեկտրական ցանցեր» ընկերությունը: «Տաշիր կապիտալ»-ը ցանկանում էր գնել նաև «Բարձրավոլտ էլեկտրական ցանցեր»-ը:

Վարչապետը նշեց, որ արագ պետք է որոշում կայացնեն «Բարձրավոլտ էլ.ցանցեր»-ի հետագա կառավարման վերաբերյալ:

«Մենք կարծում ենք` այս փուլում չպետք է անենք վերջնական հայտարարություններ ընկերության կարգավիճակի մասին: Պետք է որոշենք` պետական կառավարմա՞ է մնում, թե՞, այնուամենայնիվ, որևէ մասնավոր կառավարման է հանձնվում: Մի բան հստակ կարող ենք հայտարարել` պետք է բացառենք, որ այդ մասնավորեցման գործընթացում ներգրավված լինի իշխանության հետ առնչություն ունեցող որևէ անհատ կամ ընկերություն: Պետք է բացառվի օֆշորային ընկերությունների ներգրավվածությունը: Ընկերությունները բաց, թափանցիկ ձևով պետք է  մասնակցեն մրցույթին»,- ասաց վարչապետը:

Նա հավելեց, որ այդ ընկերության կառավարումն իրականացնելու համար անհրաժեշտ են ներդրումներ, մինչդեռ պետությունն ունի վարկային սահմանափակումներ պետական պարտքի սահմանային վիճակի կապակցությամբ: