Հրադադար Լիբիայում. հակամարտող կողմերի ղեկավարները ժամանում են Մոսկվա բանակցությունների նպատակով

Լիբիայի ազգային բանակի ղեկավար, մարշալ Խալիֆա Հաֆթարը ժամանել է Մոսկվա, որտեղ հնարավոր է՝ բանակցություններ կայանան Լիբիայի Ազգային համաձայնության կառավարության վարչապետ Ֆայեզ Սարաջի հետ. ըստ Yerkir.am-ի՝ հայտնում է ՌԻԱ «Նովոստի»-ն՝ լիբիական իրազեկ աղբյուրի խոսքերին հղումով:

Ըստ նրա՝ այսօր Մոսկվա կժամանի նաև Սարաջը։

Հիշեցնենք՝ դեռևս շաբաթ օրը ՌԴ և Թուրքիայի նախագահներ Վլադիմիր Պուտինն ու Ռեջեփ Թայիփ Էրդողանը հորդորել էին բոլոր կողմերին դադարեցնել կրակը հունվարի 12-ի կեսգիշերից և անհապաղ նստել բանակցային սեղանի շուրջ։

Կողմերը ողջունել էին նախաձեռնությունը՝ խոստանալով պատասխանել հրադադարի ցանկացած խախտման։

Լիբիայում արդեն 10 տարի է`նախկին առաջնորդ Մուամար Քադաֆիի սպանությունից հետո, իշխանության համար պայքարը չի հանգուցալուծվում: ՄԱԿ-ի աջակցությունը վայելող կառավարությանը զուգահեռ արևելյան շրջաններում ստվերային վարչակարգը առաջնորդում է գեներալ Հաֆթարը:

2019-ի ապրիլից կողմերի միջև բախումներն ավելի մասշտաբային բնույթ են կրում. ապստամբները գրոհում են կառավարական զորքերի ուղղությամբ՝ մայրաքաղաք Տրիպոլին գրավելու համար: Ըստ որոշ տեղեկությունների՝ ապստամբներին աջակցում են Արաբական Միացյալ Էմիրությունները, Եգիպտոսն ու Ռուսաստանը:

Հունվարի սկզբին Թուրքիայի խորհրդարանն արտահերթ նիստում որոշում կայացվեց, որի համաձայն՝ մեկ տարով զորք է պետք ուղարկել ներքաղաքական պատերազմի մեջ գտնվող աֆրիկյան այդ երկիր՝ ՄԱԿ-ի կողմից ճանաչված կառավարությանը սատարելու նպատակով: