Մոսկվան չի հրաժարվի Ադրբաջանին զենքի վաճառելուց

Ադրբեջանի հետ ռազմատեխնիկական համագործակցության դադարեցումը Ռուսաստանի կողմից բացասական կազդի ղարաբաղյան հակամարտության կարգավորման վրա. այս մասին, ըստ Yerkir.am-ի, հայտարարել է ՌԴ Միջազգային հարցերով կոմիտեի ղեկավար Կոնստանտին Կոսաչովը:

Նրա խոսքերով Ռուսաստանը ռազմատեխնիկական ոլորտում Հայաստանի և Ադրբեջանի հետ համագործակցում է առանձին պայմաններով:

«Երևանը հանդիսանում է ՀԱՊԿ-ում Ռուսաստանի դաշնակիցն ու գործընկերը, դա պաշտպանական միություն է: Ադրբեջանի հետ նման հարաբերություններ չկա, այդ իսկ պատճառով զենքի մատակարարման պայմաններն այլ են: Ռուսաստանի և Բելառուսի կողմից Ադրբեջանին զենք մատակարարելուց հրաժարվելը կարող է հանգեցնել նրան, որ Ադրբեջանը դա անի այլ արտադրողներից: Ինչ վերաբերում է ռուսական մատակարարումներին, ապա Մոսկվան հետևում է ուժերի հավասարակշռմանը, որը հանդիսանում է լուրջ երաշխիք՝ ռազմական գործողությունների չվերսկսման համար», - հայտարարել է Կոսաչովը:

Հիշեցնենք, որ երեկ Երևանում Կոսաչովը հանդիպում էր ունեցել ՀՀ ԱԳՆ ղեկավար Զոհրաբ Մնացականյանի հետ: