Աշխարհի ամենաերիտասարդ վարչապետը կղեկավարի Ֆինլանդիան

Ֆինլանդիայի տրանսպորտի նախարար Սաննա Մարինն ընտրվել է Սոցիալ-դեմոկրատական կուսակցության նախագահ, հետևաբար, 34-ամյա քաղաքական գործիչը կլինի ոչ միայն երկրում, այլև ամբողջ աշխարհում ամենաերիտասարդ վարչապետը. ըստ Yerkir.am-ի՝ հայտնում է The Guardian-ը: 

Մարինը կդառնա Ֆինլանդիայի երրորդ կին վարչապետը: Նրա նշանակումը տեղի կունենա մինչ դեկտեմբերի 12-ը:

Նշանակալի է նաև այն փաստը, որ կոալիցիայի մյուս չորս կուսակցությունների ղեկավարները ևս կանայք են:

«Մենք չափազանց շատ աշխատանք ունենք անելու, որպեսզի վերականգնենք վստահությունը»,- լրագրողների հետ զրույցում վստահեցրել է նորընտիր վարչապետն ու ավելացրել, որ քաղաքականության հարցում երբևէ չի մտածել իր տարիքի և սեռի մասին:

Հավելվում է, որ նորընտիր վարչապետն իր քաղաքական կարիերան սկսել է 27 տարեկանում: