Սերգեյ Սմբատյանը հայ ամենաերիտասարդ երաժիշտն է, որ հանդես կգա «Քարնեգի հոլ»-ում

Հոկտեմբերի 27-ին Նյու Յորքի հեղինակավոր «Քարնեգի հոլ»-ում Կորեայի կամերային նվագախմբի հետ, որպես ղեկավար, հանդես կգա Հայաստանի պետական երիտասարդական նվագախմբի գեղարվեստական գլխավոր դիրիժոր Սերգեյ Սմբատյանը:

Համերգասրահի պաշտոնական կայքէջից տեղեկանում ենք, որ համերգը նվիրված է նվագախմբի 50, ինչպես նաև ՅՈՒՆԵՍԿՕ-ի 70-ամյակին: Նվագախումբն ունի համաշխարհային մեծ համբավ, ավելի քան 550 համերգ է տվել աշխարհի տարբեր երկրներում, այն նաև ՄԱԿ-ի Խաղաղության կամերային նվագախումբն է:

Ի դեպ, Սմբատյանը հայ ամենաերիտասարդ երաժիշտն է, որ հանդես կգա «Քարնեգի հոլ»-ում: Հոկտեմբերի 31-ին նա կրկին կղեկավարի Կորեայի կամերային նվագախումբը նաև ոչ պակաս հայտնի «Ջորդան հոլ»-ում:

Համերգին հանդես կգան նաև ջութակահար Սոյունգ Յունը, մեցցո սոպրանո Քարլի Պաոլին, Ինո Միրկովիչը: