Կարևոր է ԼՂ կարգավորման գործընթացում խուսափել հռետորաբանությունից. Լավրով

Մոսկվան շահագրգիռ է, որ Ղարաբաղյան կարգավորմանն ուղղված վստահության միջոցառումները կյանքի կոչվեն, և կարևոր է խուսափել հռետորաբանությունից. ըստ yerkir.am-ի՝ հայտարարել է ՌԴ ԱԳ նախարար Սերգեյ Լավրովը, որն այսօր պաշտոնական այցով մեկնել է Բաքու:

Վաղը տեղի կունենան նրա բանակցությունները ադրբեջանցի գործընկերոջ հետ:

«Մենք շահագրգռված ենք, որ վստահության միջոցառումների, հումանիտար շփումների  հաստատման վերաբերյալ պայմանավորվածությունները  այդ թվում ՝ ԶԼՄ-ների մասով, որոնք ձեռք էին բերվել Վիեննայի գագաթաժողովում և հաստատվել  Մոսկվայում նախարարական հանդիպման ժամանակ, կյանքի կոչվեն: Դրանց հետզհետե իրագործվում են, և հուսով եմ՝ այս շաբաթ նախատեսված՝ Հայաստանի և Ադրբեջանի արտգործնախարարների հանդիպումը հնարավորություն կտա համախմբելու այդ գործընթացները»,- ըստ ՌԻԱ «Նովոստի»-ի՝ ասել է Լավրովը Ադրբեջանի նախագահ Իլհամ Ալիևի հետ հանդիպման ժամանակ:

Նա նաև հավելել է. «Համաձայն եմ ձեզ հետ, որ երկարատև քաղաքական կարգավորման ուղղությամբ դեռ շատ բան է պետք անել: Լիովին աջակցում եմ ձեր այն թեզին, որ հարկավոր է խուսափել հռետորաբանությունից, որը հակասում է երկու կողմից հավանություն ստացած և ՄԱԿ-ի կանոնակարգում ու Հելսինկյան եզրափակիչ ակտում ամրագրված հիմնարար սկզբունքներին»: