Հայաստանն էլ կարող է հիշեցնել, թե ինչպես են Ադրբեջանում պատվում Ռասուլզադեին. ռուս փորձագետ

Հուշարձանը չեն հանի, ընդհակառակը՝ Հայաստանն էլ կարող է հիշեցնել, թե ինչպես են Ադրբեջանում պատվում Մամեդ Էմին Ռասուլզադեին, որի համար նացիզմը խորթ չէր. «Վզգլյադ» թերթի հետ զրույցում ասել է Կովկասի հարցերով փորձագետ Նիկոլայ Սիլաևը՝ արձագանքելով Ադրբեջանի նախագահ Իլհամ Ալիևի կտրուկ պահանջին՝ հանել  «ֆաշիստ» Գարեգին Նժդեհի՝ Երևանում տեղադրված արձանը:

«Կարծում եմ՝ այդ հայտարարությանը որևէ բան չի հետևի»,- ասել է նա:

Ըստ Սիլաևի՝ Երևանը կարող է համաչափ պատասխան տալ՝ Մամեդ Էմին Ռասուլզադեի՝ Ադրբեջանական առաջին հանրապետության քաղաքական գործչի մասին խաղաթուղթը գործողության մեջ դնելով: Երկրորդ համաշխարհային պատերազմի տարիներին էմիգրանտ Ռասուլզադեն «բանակցությունների և խորհրդատվությունների համար» հրավիրվել էր Բեռլին՝ վերմախտի և SS-ի կազմում ազգային լեգեոններ ձևավորելու  նպատակադրման շրջանակներում: Փաստը ադրբեջանցի պատմաբանները չեն հերքում:

«Նմանատիպ պատմական գործիչներ եղել են բոլոր հետխորհրդային երկրներում, որոնց այնտեղ երկրպագում են»,- նշել է փորձագետը:

Ըստ նրա՝ եթե Ադրբեջանը խնդիր է ունեցել ամրապնդելու Նժդեհի պաշտամունքը Հայաստանում, ապա քայլ է արել այդ ուղղությամբ: «Որովհետև՝ եթե Ադրբեջանը պահանջում է հանել արձանը, դա նշանակում է, որ կգործեն ճիշտ հակառակ ուղղությամբ»,- ամփոփել է Սիլաևը: