Ստորագրությամբ բաց են թողել, ձերբակալված չկա, երևի մարդ են ման գալիս, որ սուտ ցուցմունք գրի․ Սևակ Խաչատրյան

«Հաղթանակ» դաշինքի երեք անդամի մեղադրանք է առաջադրվել կաշառակերության համար: Այս մասին նոյեմբերի 18-ին լրագրողների հետ հանդիպման ժամանակ հայտարարել է ընդդիմադիր «Հաղթանակ» դաշինքի Վաղարշապատ համայնքի քաղաքապետի թեկնածու Սևակ Խաչատրյանը:

Նա բացատրել է, որ խուզարկություններ են իրականացվել «Հաղթանակ» դաշինքի նախընտրական ցուցակից Արմեն Դավթյանի, Կարեն Գևորգյանի և Տիգրան Գևորգյանի տներում՝ նշելով, որ այդ անձինք ազատ են արձակվել գրավի դիմաց։

Խաչատրյանը պարզաբանել է, որ իրեն չեն հրավիրել հարցաքննության և որ իր տունը չի խուզարկվել՝ չբացառելով այն հնարավորությունը, որ դաշինքի հաղթանակի դեպքում ամբողջ քաղաքական ուժը կուղարկվեր բանտ։ «Հակակոռուպցիոն կոմիտեի տվյալներով՝ դաշինքի ներսում տարաձայնություններ սերմանելուն ուղղված քրեական գործով ներգրավված են հինգ անձ, որոնցից երկուսին ես չեմ ճանաչում», - նշել է նա՝ չբացառելով այն հնարավորությունը, որ այս գործերով փորձեր են արվում գտնել մեկին, ով կեղծ ցուցմունք կտա իր դեմ։ Նա վստահություն  է հայտնել, որ այդ փորձերը ապարդյուն կլինեն։

Նրա գնահատմամբ, ինքնուրույն իշխանություն ձևավորելու հնարավորություն ստացած իշխող կուսակցությունը չի կարող հաշտվել այն մտքի հետ, որ համայնքում կա մի քաղաքական ուժ, որը հավաքել է 10 հազար ձայն։ «Իշխող ուժը, առաջիկա խորհրդարանական ընտրությունների նախաշեմին, շարունակելու է վարկաբեկել մեր ուժը», - հավելել է ընդդիմադիրը։

Հիշեցնենք, որ նոյեմբերի 16-ին Վաղարշապատի ավագանու ընտրությունների արդյունքներով իշխող «Քաղաքացիական պայմանագիր» կուսակցությունը ստացել էր 48,5% ձայն։ Երկրորդ տեղը զբաղեցրել էր «Հաղթանակ» դաշինքը՝ հավաքելով 31,8% ձայն։ Ընդդիմադիրների հետապնդումները սկսվել են հենց Վաղարշապատի ընտրություններից հետո՝ հաջորդ օրը։

Ավելին՝ տեսանյութում: