Թիրախավորում են Վարդան Ղուկասյանին, իբր հրապարակային կոչ է արել հրաժարվել ինքնիշխանությունից. փաստաբան

Այսօրվա դատական նիստում վկաների հարցաքննության փուլն է, այլ գործողություններ չեն սպասվում, սա կապ չունի այն վարույթի հետ, որով հիմա նախաքննություն է իրականացնում։ Այս մասին այսօր՝ նոյեմբերի 18–ին, լրագրողների հետ զրույցում նշեց Գյումրիի քաղաքապետ Վարդան Ղուկասյանի պաշտպան Արամայիս Հայրապետյանը։

«Սա վերաբերում է այն դրվագներին, որոնք Վարդան Ղուկասյանին մեղսագրվում են նախկին քաղաքապետ եղած ժամանակաշրջանում հողերի վաճառքին, օտարումներին՝ աճուրդների միջոցով»,–ասաց նա։

Դիտարկմանը, որ Վարդան Ղուկասյանին մեղսագրվում էր կաշառքի գործը, բայց հետո այլ հոդվածներ ևս ավելացան, պաշտպանն ասաց. «Հոդվածներից մեկը վերաբերում է իբր անկախությունից, ինքնիշխանությունից հրաժարվելու հրապարակային կոչերին։ Մասնավորապես խոսքը վերաբերում է նրան, որ հարցազրույցների ընթացքում Վարդան Ղուկասյանը կարծիք է հայտնել, որ արժե միանալ միութենական պետությանը՝ շեշտելով, որ պետք է պահպանել Հայաստանի Հանրապետության անկախությանը։ Նույն կերպ, շատ անձիք ցանկանում են, որ Հայաստանը միանա Եվրամիությանը, մի մասը ԲՐԻԿՍ–ին և այլն։ Բայց այս բոլոր կարծիքների մեջ, քանի որ հենց Վարդան Ղուկասյանն էր այդ կարծիքը հայտնել, աբսուրդային մեղադրանք առաջադրեցին, որ իբր այդ կերպ Վարդան Ղուկասյանը հրապարակային կոչ է արել ինքնիշխանությունից հրաժարվելու։