Վերջ ի վերջո, հայոց լեզուն մեր լեզուն է. ԵՊՀ բանասիրության ֆակուլտետի չորրորդ կուրսի ուսանողներ

Վերջ ի վերջո, հայոց լեզուն մեր լեզուն է. այսօր Yerkir.am-ի հետ զրույցում նշեցին ԵՊՀ բանասիրության չորրորդ կուրսի ուսանողներից մի քանիսը:

«Եթե վերցնենք այն տարբերակը, որ որոշ ֆակուլտետներում, ելնելով ընտրած մասնագիտությունից, չպարտադրվի հայոց լեզուն, ապա կընդունվի այս նախագիծը, բայց պետք է մի քիչ խորքային դիտարկել, օրինակ՝ 15 տարի հետո ինչ կլինի մեր վիճակը, եթե մենք չսովորենք մեր լեզուն ու մեր պատմությունը»,- ասացին նրանք: 

Ուսանողների խոսքով`օրինակ, Չինաստանում պարտադրում են իրենց լեզուն` չինարենը, և անգլերենը մղում հետին պլան, իսկ մեր երկրում հակառակն են ուզում անել:

«Ներկայումս դպրոցի գիտելիքը  բավարար չէ «Հայոց լեզու», «Հայ գրականություն» և «Հայոց պատմություն» առարկաների մասով: Թող ԿԳՄՍ նախարարությունը սկսի դպրոցներից` մշակելով խորքային ուսուցման ծրագիր»,- առաջարկեցին ուսանողները:

Ավելի վաղ Yerkir.am-ը տեղեկացրել էր, որ այսօր` նոյեմբերի 6-ին, ժամը 09:30-ից սկսած, ԵՊՀ հայ բանասիրության ֆակուլտետի ուսանողները դասադուլ են հայտարարելու, որով հանդես են գալու ԿԳՄՍ նախարարության կողմից շրջանառության մեջ դրված «Բարձրագույն կրթության մասին» օրենքի նախագծում «Հայոց լեզու», «Հայոց պատմություն» և «Հայ գրականություն» առարկաների դասավանդումը ոչ մասնագիտական բուհական ծրագերում ոչ պարտադիր դարձնելու մասին դրույթի դեմ:

Նարա Մարտիրոսյան