Ծրագրվում է նոր ինքնաթիռ գնել Հայաստանի վարչապետի համար. Աղաջանյան

Վարչապետի թռիչքն ԱՄՆ նրա ծառայողական ինքնաթիռով կազմակերպելն անհնար է, որովհետև վարչապետին սպասարկող օդաչուները չունեն օվկիանոսը հատելով թռիչք կատարելու լիցենզիա: Այսօր այս մասին խորհրդարանում հայտարարեց վարչապետի աշխատակազմի ղեկավար Էդուարդ Աղաջանյանը։

Խոսքը վերաբերում էր սեպտեմբերին կայացած թռիչքին, որի վրա մոտ 160 միլիոն դրամ է ծախսվել։ Իսկ վարչապետի ինքնաթիռում վառելիքի հավելյալ բաքերի տեղադրումը, ինչի առաջարկ եղել էր մամուլում, Աղաջանյանի պնդմամբ, կարող է միլիոնավոր դոլարների ծախսի պատճառ դառնալ։

Աղաջանյանը հավելեց, որ հիմա իրենք լուծումներ են դիտարկում։

«Տարբերակներ ենք քննարկում, այդ թվում՝ նաև նոր ինքնաթիռի գնման տարբերակն է քննարկվում, որովհետև գործող ինքնաթիռը բավականին հին է և արդեն որոշ ստանդարտներին չհամապատասխանող։ Նաև նորագույն, նոր տեխնոլոգիաների առկայության պարագայում ծախսի տեսանկյունից, վառելիքի ծախսի տեսանկյունից, ընթացիկ վերանորոգումների ծախսերի տեսանկյունից, շատ ավելի նպատակահարմար կարող է լինել նոր ինքնաթիռի ձեռք բերումը։ Բայց սա դեռ վերջնական որոշում է, սա ընդհանրապես դեռ որոշում չէ»,- նշեց նա: