Կայարանցի Թևոսիկի եղբոր սպանության մեջ մեղադրվող Իսոյի դեմ մահափո՞րձ է ծրագրվում (լուսանկարներ)

Քրեական հեղինակություն Կայարանցի Թևոսիկի եղբոր՝ Արթուր Սաֆարյանի սպանության գործով միակ մեղադրյալ Իսրայել Սարգսյանին այսօր դատարան էին բերել ոստիկանության հատուկ ծառայակիցների ուղեկցությամբ: Այս հանգամանքը տարօրինակ էր նրանով, որ շուրջ 9 ամիս տևած դատաքննության ընթացքում երբևէ նրա նկատմամբ նման հսկողություն չէր սահմանվել:

Yerkir.am-ին հասած որոշ տեղեկություններով՝ իրավապահ մարմինները օպերատիվ տեղեկություններ են ստացել այն մասին, որ Իսրայել Սարգսյանի դեմ մահափորձ է ծրագրվում, և դա կանխելու նպատակով անվտանգության միջոցառումներ են ձեռնարկվել նրան դատարան տեղափոխելու և դատարանում պահելու ընթացքում:

Նշենք, որ ինքը՝ Իսրայել Սարգսյանը, իրեն մեղավոր չի ճանաչում և բազմիցս հայտարարել է, որ չէր կարող սպանել ընկերոջը՝ Արթուրին, և որ իրականում «իր գլխին սարքել են»: Սակայն սպանված Արթուր Սաֆարյանի հարազատները, մասնավորապես` նրա եղբայրը՝ Թևոս Սաֆարյանը, ու նրա շրջապատը վստահ են, որ սպանությունը ծրագրել և իրականացրել է Իսրայել Սարգսյանը: Yerkir.am-ին հասած տեղեկություններով՝ Թևոսիկը նեղ շրջապատում անձնական զրույցների ժամանակ հայտարարել է, որ լուծելու է Արթուրի սպանության վրեժը:

Հիշեցնենք,  որ այսօր Իսրայել Սարգսյանը հերթական ուշագրավ հայտարարությունն էր արել դատարանում՝ ասելով, որ իր համար կասկածելի է գործով կարևոր վկայի` իր մերձավոր Էդգար Միքայելյանի ինքնասպան լինելու հանգամանքը:

Հիշեցնենք, որ Միքայելյանը Փոքր Մհեր» կրթահամալիրի նախկին տնօրենն էր, կոչումով` գնդապետ: Նրա դին հայտնաբերել էին սեպտեմբերի 24-ի առավոտյան Քանաքեռավանում գտնվող իր տան բակում` ծառից կախված: