Գրական հանդիպում՝ Վարդենիսում

ՀՅԴ «Գեղամա» կոմիտեի (Վարդենիսի շրջան) և ՀՅԴ Վարդենիսի երիտասարդական միության նախաձեռնությամբ՝ Վարդենիսում էին գրող-բանաստեղծներ Աբգար Ափինյանը, Վարուժան Ղազանչյանն ու Սուսաննա Ղազարյանը:

Գրական ջերմ հանդիպում կազմակերպվեց Վարդենիսի թիվ 2 հիմնական դպրոցի և Վարդենիսի «Բադեյան» պետական քոլեջի հարկերի տակ՝ ուսուցչական անձնակազմի և ուսանողների ու աշակերտների հետ:

Հանդիպումն անցավ՝ հույզերով ու զգացմունքներով շաղախված, նաև  առաջիկա հանդիպումների պայմանավորվածություն ձեռք բերվեց: Քննարկվեցին ոչ միայն գրականությանը,այլ նաև հայոց լեզվի պահպանությանը վերաբերող հարցեր, որոնց պետք է ընթացք տրվի առաջիկայում:

Վարդենիս քաղաքը ներկայացրեց նաև իր թումանյանասեր երիտասարդներին ու պատանիներին, որոնք հանդես եկան իրենց սիրելի ստեղծագործությունների ասմունքով:

Բանաստեղծների այցը մեծ ոգևորություն առաջացրեց ներկաների շրջանում, քանի որ կարևորվեց ազգայինը, վերմարդկայինը և հոգու հացը, որը չպակասեց:

Վարդենիսից՝ հատուկ Yerkir.am-ի համար