ԱՄՆ և Իրանի նախագահների ընդհանուր հանդիպումը կախված է Իրանի որոշումից. Պոմպեո

ԱՄՆ նախագահ Դոնալդ Թրամփի և Իրանի նախագահ Հասան Ռոհանիի հանդիպման հավանականությունը ՄԱԿ-ի Գլխավոր վեհաժողովի շրջանակում կայանալիք ընդհանուր քննարկումների ժամանակ կախված կլինի Թեհրանի որոշումներից։ Այս մասին հայտնում է ռուսական ТАСС գործակալությունը՝ վկայակոչելով ԱՄՆ պետքարտուղար Մայք Պոմպեոյի խոսքերը։

«Մենք ցանկանում ենք խորհրդակցություն անցկացնել: Նախագահ Թրամփը հայտարարություն է տարածել, թե պատրաստ է հանդիպել նախագահ Ռոհանիի հետ՝ առանց նախապայմանների: Նա այս մասին բազմիցս է ասել»,- նշել է ամերիկյան դիվանագիտության ղեկավարը:

Անդրադառնալով հարցին՝ արդյո՞ք ենթադրում է, որ ղեկավարները կարող են հանդիպում անցկացնել այս ամիս կայանալիք ՄԱԿ-ի ԳՎ շրջանակում, Պոմպեոն ասել է. «Չեմ կարող ասել: Այաթոլլայից է կախված, թե նա ճիշտ որոշում կընդունի՞ իր երկրի քաղաքականության վերաբերյալ»:

Նշվում է նաև, որ ԱՄՆ առաջնորդը չորեքշաբթի հայտարարել էր, որ չի բացառում հանդիպման անցկացումը Ռոհանիի հետ ՄԱԿ-ի ԳՎ քննարկումների շրջանակում: