Տեխասում տեղի ունեցած հրաձգության զոհերի թիվը հասել է 20-ի

ԱՄՆ Տեխաս նահանգի Էլ Պասո քաղաքի Walmart հանրախանութում երեկ՝ օգոստոսի 3-ին, տեղական ժամանակով՝ ժամը 11:00-ին, հրաձիգը կրակ է բացել հաճոխորդների ուղղությամբ. տեղեկացնում է CNN-ը:

Նախնական տվյալներով զոհվել է 20 մարդ, վիրավորվել՝ 26-ը, որոնցից 9-ի վիճակը ծայրահեղ ծանր է:

Ոստիկանությունը հայտարարել է, որ հանցագործությունը կատարելու կասկածանքով ձերբակալել է մեկ մարդու: Արդեն հայտնի է, որ ձերբակալվածը Տեխասի Ալեն քաղաքի բնակիչ, 21-ամյա Պատրիկ Կրուսիուսն է, որը հանձնվել է առանց դիմադրություն ցույց տալու:

Ոստիկանության տվյալներով՝ հանցագործությունը մեծ հավանականությամբ կատարվել է ատելության հողի վրա: Իրավապահ մարմիններն ուսումնասիրում են հանցագործության նախօրեին, սոցիալական ցանցերում հրապարկված հաղորդագրությունը, որում նշված է, որ կրակոցները պատասխան քայլ են, լատինամերիկացի միգրանտների կողմից Միացյալ Նահանգների «բռնազավթմանը»: