Զորակոչային կենտրոնական բժշկական հանձնաժողովի կազմում կընդգրկվի առողջապահության նախարարության ներկայացուցիչը. կառավարության որոշում

Կառավարության այսօրվա նիստում  որոշում է կայացվել զորակոչով զբաղվող կենտրոնական բժշկական հանձնաժողովի կազմում ընդգրկել նաև առողջապահության նախարարության ներկայացուցչին:

Որոշումը, մասնավորապես, հիմնավորվում է այն փաստով, որ զորակոչի առողջապահական բաղադրիչի համար պատասխանատու է առողջապահության նախարարությունը: Զինկոմիսարիատների բժշկական հանձնաժողովները կազմավորվում են առողջապահության նախարարի հրամանով, կազմակերպվում է նախազորակոչային և զորակոչային տարիքի արական սեռի քաղաքացիների հիվանդանոցային բուժումը, ինչպես նաև առողջապահության նախարարությունը համակարգում է նախազորակոչային և զորակոչային տարիքի քաղաքացիների պատվաստումների գործընթացը:

Այս ամենից զատ` նախարարությունը տրամադրում է ֆինանսական փոխհատուցում պետության կողմից երաշխավորված անվճար բժշկական օգնության և սպասարկման շրջանակներում նախազորակոչային և զորակոչային տարիքի քաղաքացիներին մատուցված բժշկական ծառայությունների դիմաց:

Այնուամենայնիվ, քանի որ ներկայումս կենտրոնական բժշկական հանձնաժողովի կազմում առողջապահության նախարարության ներկայացուցիչ ընդգրկված չէ, զորակոչի ամբողջ գործընթացի կազմակերպման ընթացքում առողջապահության նախարարությանը վերապահված գործառույթների լիարժեք և արդյունավետ իրականացման տեսանկյունից հարցը խնդրահարույց է: Եվ հետո հաճախ են այնպիսի դեպքերը, երբ հանձնաժողովի կողմից առողջապահության նախարարության խորհրդատուներին, ըստ անհրաժեշտության, պարզաբանումներ ստանալու վերաբերյալ գրություններ են հասցեագրվում, որը դարձյալ  օրենսդրությամբ կարգավորված չէ:

Նկատի ունենալով վերոհիշյալ հանգամանքները` որոշում կայացվեց առ այն, որ առողջապահության նախարարի կողմից առաջադրված ներկայացուցիչը ևս ներգրավված լինի կենտրոնական բժշկական հանձնաժողովի կազմում: Նման նշանակումը հնարավորություն կտա մշտադիտարկելու տարածքային զինվորական կոմիսարիատների բժշկական հանձնաժողովների կողմից տրված առողջական վիճակի մասին եզրակացությունների որակը, ինչպես նաև կնպաստի զորակոչիկների առողջական վիճակի վերաբերյալ ԿԲՀ-ի կողմից տրվող եզրակացությունների որակի բարձրացմանն ու առավել թափանցիկ և արդյունավետ կդարձնի զորակոչիկների բժշկական հետազոտումը և փորձաքննությունը:

Թեկնածուի ներկայությունը հանձնաժողովում հնարավորություն կտա նաև ուսումնասիրելու և արծարծելու զորակոչի ընթացքում առողջապահության ոլորտին վերաբերելի խնդիրները, օպերատիվ կարգով լուծումներ առաջադրելու այդ խնդիրներին և արդյունավետ կերպով համակարգելու ԿԲՀ-ի կողմից բժշկական հաստատություններ ուղարկված զորակոչիկների բժշկական հետազոտման և բուժման գործընթացը: