Քաղաքացին զգում է, որ ոչ ոքի պետք չէ, ինքը ոչինչ է. Պարույր Հայրիկյան

Մենք այնպիսի իրավիճակում ենք, որ խոսք պետք է գնար ոչ թե նվազագույն աշխատավարձը մի քանի տոկոսով բարձրացնելու, այլ այն մի քանի անգամ բարձրացնելու մասին. այսօր լրագրողների հետ զրույցում ասաց «Ազգային ինքնորոշում միավորում» կուսակցության նախագահ Պարույր Հայրիկյանը:

Ըստ նրա` եթե հեղափոխություն է տեղի ունեցել ու այդ հեղափոխությունը ստանում է նաև տնտեսական շեշտադրումներ, ապա աշխատավարձն ընդամենը 10-20 տոկոս բարձրացնելը ոչ միայն ձեռքբերում չէ, այլ կարող ենք տեղապտույտ համարել:

«Դա իմ մասնավոր կարծիքը չէ, ես առաջնորդվում եմ համամարդկային փորձառությամբ: Եվ հասկանում եմ, որ նման իրավիճակներում առաջընթացի խթանիչները պետք է լինեին բարոյահոգեբանական, ինչ-որ առումով` նաև պատմական ու իրավական հիմնավորմամբ: Պատմահոգեբանական ու քաղաքական խթանիչներ, ցավոք, չստեղծվեցին անկախության տարիներին: Հայաստանում չունեցանք ապրող հավաքականություն, Հայաստանն իր հիմնական տունը համարող քաղաքացիներ: Քաղաքացու նկատմամբ մեր արհամարհական, կամայական վերաբերմունքով ցույց տվեցինք, որ քաղաքացին ոչինչ չի նշանակում: Քաղաքացին էլ հասկացավ, որ ինքը ոչինչ է, հետևաբար` իրեն պետք է պահի որպես ոչինչ: Մենք հպարտանում ենք էգոիստական նկատառումներով ապրող սերնդով, որը միայն լավ սովորելու մասին է մտածում, ինչը ողջունելի է, բայց այդ ամենը չի շաղկապում նրան հայրենիքի հետ»,- նշեց Հայրիկյանը` ընդգծելով, որ նման պայմաններում բացակայում են ազգի զարգացման համար կարևոր բաները` պատմական հիմքի վրա ստեղծված բարոյահոգեբանական ընդհանրական արժեքներն ու քաղաքացուն արժևորող հանրությունը:

ԱԻՄ առաջնորդը հավելեց նաև, որ թեև Հայաստանը սոցիալիստական երկիր է, բայց մեզ մոտ աշխատանքային օրենսդրություն չի գործում, մարդիկ աշխատում են առանց հանգստի: Հետևաբար, ըստ նրա, բնական է, որ քաղաքացին զգում է, որ ոչ ոքի պետք չէ, ինքը ոչինչ է: ««Մենք ենք տերը մեր երկրի» կարգախոսով իշխանության եկածներն ասում էին, թե ուշադիր են լինելու քաղաքացու հանդեպ, գործնական քայլեր են կատարելու այդ ուղղությամբ, բայց այն, ինչ կատարվում է, դիմահարդարային քայլեր են: Այս իրավիճակում ավելի ընդգծելի է դառնում քաղաքացուն` ինչ-որ առումով իրավական հարդարանքի միջոցով երկրի տերը դարձնելու պահանջը: Իսկ դա անելու համար պետք է ոչ թե սահմանադրական փոփոխություններ անել, այլ Սահմանադրության մեջ ամրագրել»,- նշեց Հայրիկյանը` հավելելով, որ ՀՀ քաղաքացին պետք է դառնա գործոն, ու դա կարող է անել միմիայն Սահմանադրության միջոցով: