Զարիֆը մեկնաբանել է Ջիբրալթարում իրանական նավթով նավի ձերբակալությունը

 Իրանի ԱԳ նախարար Մոհամադ Ջավադ Զարիֆը  Ջիբրալթարի իշխանությունների կողմից իրանական նավթով նավի ձերբակալությունը վտանգավոր նախադեպ է համարում. հայտնում է РИА Новости-ն:

«Իրանը ԵՄ անդամ չէ և չի ենթարկվում եվրոպական որևէ նավթային էմբարգոյի: Երբ ես վերջին անգամ ստուգել եմ, ԵՄ-ն դեմ էր արտատարածքայնության սկզբունքին: Բրիտանիայի կողմից նավթատար նավի անօրինական զավթումը սովորական ծովահենություն է: Այն վտանգավոր նախադեպ է ստեղծում և պետք է դադարեցվի»,- գրել է Զարիֆն իր թվիթերյան էջում:

Հիշեցնենք, որ հինգշաբթի հայտնի է դարձել, որ Ջիբրալթարում բրիտանական իշխանությունները ձերբակալել են նավթատար նավ, որը հում նավթ էր տեղափոխում Սիրիա:

Ըստ Ջիբրալթարի վարչապետ Ֆաբիան Պիկարդոյի` տեղեկություն է եղել, որ Grace 1 նավը գործել է` Սիրիայի դեմ ԵՄ պատժամիջոցների խախտելով: Իրանի ԱԳՆ-ն բողոք է հայտնել Բրիտանիային և պահանջել ազատ արձակել նավը: