Ռոբերտ Քոչարյանը կկալանավորվի

Հունիսի 25-ին` ժամը 16։00-ին, ՀՀ Վերաքննիչ քրեական դատարանը, դատավոր Արմեն Դանիելյանի նախագահությամբ, հրապարակեց  ՀՀ գլխավոր դատախազության կողմից բողոքարկված՝ ՀՀ երկրորդ նախագահ Ռոբերտ Քոչարյանի նկատմամբ ընտրված խափանման միջոց կալանավորման որոշումը փոփոխելու և Սահմանադրական դատարան դիմելու որոշումը կասեցնելու վերաբերյալ Երևան քաղաքի ընդհանուր իրավասության դատարանի որոշման վերաբերյալ վճիռը։ 

Վերաքննիչը որոշեց  բավարարել մեղադրող դատախազների միջնորդությունը և բեկանել որպես խափանման միջոց ընտրված կալանավորման վերացման, փոփոխման կամ պահպանման հարցը քննության առնելու մասին առաջին ատյանի դատարանի դատավոր Դավիթ Գրիգորյանի` մայիսի 18–ի որոշումը:

Դանիելյանը նաև որոշեց վերացնել Երևանի ընդհանուր իրավասության դատարանի որոշումը Քոչարյանի խափանման միջոց կալանքն անձնական երաշխավորությամբ փոխելու մասին, և Ռոբերտ Քոչարյանի նկատմամբ որպես խափանման միջոց կիրառել կալանավորումը:

Հավելենք, որ  դատավորի որոշման հրապարակման պահին Քոչարյանի պաշտպանական կողմը ներկա չէր։ Նրանք մինչ այդ հայտարարություն էին տարածել՝ տեղեկացնելով, որ ներկա չեն լինի՝ այդպիսով իրենց բողոքն արտահայտելով դատավոր Արմեն Դանիելյանի գործողությունների դեմ։