Հայկական պատվիրակության ոչ միանշանակ քվեարկությունը` ԵԽԽՎ-ում

Եվրոպայի խորհրդի Խորհրդարանական վեհաժողովի` ՌԴ պատվիրակության մասնակցության վերաբերյալ քվեարկությանը մասնակցել է նաեւ հայաստանյան պատվիրակությունը: Հայաստանի Ազգային ժողովի «Լուսավոր Հայաստան» խմբակցության ղեկավար Էդմոն Մարուքյանը եւ ԲՀԿ խմբակցության պատգամավոր Նաիրա Զոհրաբյանը կողմ են քվեարկել բանաձեւին, որը հնարավորություն է տալիս Ռուսաստանին վերադառնալ ԵԽԽՎ:

Մինչդեռ Ազգային ժողովի արտաքին հարաբերությունների մշտական հանձնաժողովի նախագահ, իշխող կուսակցության անդամ Ռուբեն Ռուբինյանը դեմ քվեարկածների ցուցակում է:

«Իմ քայլը» դաշինքի մյուս անդամները` Հովհաննես Իգիթյանը, Տաթեւիկ Հայրապետյանը եւ Սոս Ավետիսյանը չեն մասնակցել քվեարկությանը:

Ավելի ուշ Ռուբեն Ռուբինյանը վարման կարգով հայտարարել է, որ երեկ քվեարկության ժամանակ թյուրիմացություն է տեղի ունեցել` ինքը դեմ չի քվեարկել: Նախագահողը տեղեկացրել է, որ քվեարկությունն ավարտվել է, եւ այլեւս հնարավոր չէ փոփոխություն: