Ստամբուլում ավարտվեցին ընտրությունները

Այսօր Ստամբուլում երկրորդ անգամ անցկացվեցին քաղաքապետի ընտրություններ: Առաջին անգամ՝ մարտի 31-ի համապետական ՏԻՄ ընտրությունների ժամանակ, Էրդողանի Արդարություն և զարգացում կուսակցությունը դարձյալ պարտվել էր Ստամբուլում ձայների չնչին՝ 13000 քվե տարբերությամբ։ Սակայն ԱԶԿ-ի բողոքարկումից հետո արդյունքները չեղյալ հայտարարվեցին, և նշանակվեցին երկրորդ ընտրությունները։

Երևանի ժամանակով 18։00-ին արդեն փակվել էին բոլոր ընտրատեղամասերը, և սկսվել հաշվարկները։ Չնայած դեռևս ոչ պաշտոնական տվյալների, հաղթել է ընդդիմադիր Հանրապետական-Ժողովրդական կուսակցության թեկնածու Էքրեմ Իմամօղլուն։ ԱԶԿ թեկնածու` նախկին վարչապետ և ԹԱՄԺ նախագահ Բինալի Յըլդրըրըմը, արդեն շնորհավորել է մրցակցին հաղթանակի համար։

Ընտրությունների ընթացքում տեղեկություններ էր տարածվել, որ մի շարք քվեաթերթիկների վրա չկան կնիքներ։ ԱԶԿ-ն և ՀԺԿ-ն բողոքարկել էին, սակայն Բարձրագույն ընտրական հանձնաժողովը վավեր է ճանաչել քվեները։

Հաշվարկվել են արդեն քվեաթերթիկների 95.2 տոկոսը, ըստ որի` Իմամօղլուն ստացել է 53.68, իսկ Յըլդըրըմը 45.40 տոկոս։

Այսպիսով,  Իմամօղլուն արդեն երկրորդ անգամ է հաղթանակ տանում իշխանական թեկնածուի նկատմամբ և այս անգամ արդեն ձայների ահռելի առավելությամբ։