Ֆրենկ Փալոնը Հայաստան-ԱՄՆ հարաբերությունների 100-ամյակի կապակցությամբ երկկուսակցական բանաձև է ներկայացրել Կոնգրես

Կոնգրեսի հայկական հարցերի հանձնախմբի համանախագահ Ֆրենկ Փալոնը, մյուս համանախագահների՝ Ջեքի Սփիրի, Ադամ Շիֆի, Գաս Բիլիրաքիսի և Փիթեր Քինգի հետ համատեղ,  Հայաստան-ԱՄՆ հարաբերությունների 100-ամյակի կապակցությամբ երկկուսակցական բանաձև է ներկայացրել ԱՄՆ Կոնգրես. տեղեկացնում է ԱՄՆ Հայ Դատի հանձնախումբը:

Ներկայացված բանաձևում նշվում է Հայաստանում ժողովրդա­վարական առաջընթացի, արտահերթ խորհրդարանական ընտրությունների մասին, երկկողմ քաղաքական, տնտեսական և ռազմավարական գործընկերության զարգացման, ՆԱՏՕ-ի շրջանակ­ներում խաղաղապահ առաքելություններին ՀՀ մասնակցության, օգնությունից առևտուր ձևաչափով համագործակ­ցության և ՀՀ ժողովրդավարացման հարցերում ԱՄՆ աջակցության վերաբերյալ:

Հավելվում է նաև, որ վերոհիշյալ բանաձևում ԵԱՀԿ ՄԽ գործընթացում ՀՀ շարունակական կառուցողական դերը մեծ է, ինչպես նաև ակնարկվում է Հայաստանի, Ադրբեջանի և Լեռնային Ղարաբաղի կողմից 1994թ. ստորագրված հրադադարի մասին:

Ըստ բանաձևի` ԱՄՆ Կոնգրեսը նշում է ԱՄՆ-Հայաստան հարյուրամյա հարաբերությունները, երկու բարեկամ ժողովուրդների և կառավարությունների միջև ամուր կապերը, ինչպես նաև ամերիկահայ համայնքի ներդրումը Միացյալ Նահանգների զարգացման գործում:

Բանաձևը ԱՄՆ-ի կողմից Հայաստանին շարունակական աջակցության  կոչ է անում` կոչված  ամենաբազմաբնույթ ոլորտներում, այդ թվում` ռազմական խորհրդատվությունների անցկացման միջոցով երկկողմ հարաբերությունների ամրապնդմանը: