Հարկային փոփոխությունները սոցիալական ընդվզման են հանգեցնելու, ժողովրդին քաղաքական քայլերով հնարավոր չի լինելու կերակրել. Մեսրոպ Մանուկյան

Վերջերս ԱԺ-ում քննարկվում էր բյուջեի ծախսային մասը, որպեսզի հաստատվի: Ներկայացված թվերից պարզ դարձավ, որ  3.6 միլիարդ դրամ ծախսային հատվածը թերակատարվել է, այսինքն՝ ծախսերը չեն կատարվել, որի առյուծի բաժինը վերաբերում է բնակարանաշինությանը: Այս մասին լրագրողներին ասաց Զինծառայողների ապահովագրության հիմնադրամի հոգաբարձուների խորհրդի անդամ Մեսրոպ Մանուկյանը՝ պնդելով, որ բյուջեում գումարներ եղել են, բայց կառավարությունը թերացել է, ինչի մասին կարող են վկայել շինարարական ընկերությունները: 

«Այստեղ նրանք  կատարել էին ծրագրերի 46 տոկոսը միայն, 54 տոկոսը չէին իրականացրել: Կամ` ոռոգման համակարգի արդիականացման հետ կապված մոտ 28  տոկոս թերակատարում են ունեցել: Այստեղ բացի այն, որ բյուջետային ծախսեր էին, դրանք նաև վարկային համաձայնագրերի արդյունքում  պիտի իրականացվեն, և քանի որ այս նախագծերը չեն կատարվել, բնականաբար, տույժեր և տուգանքներ են վճարել: Ֆինանսների նախարարն ինքը փաստեց, որ միայն մի ծրագրով կես միլիոն դոլարի վնաս են փոխհատուցել: Նրանք մի կողմից մեղադրում են, որ կոռուպցիոն ռիսկեր են նկատում շինարարության ոլորտում, մյուս կողմից հայտարարվում է՝ կոռուպցիա չկա: Իրար հակասող փաստարկներից քաղաքացին է տուժում, քանի որ այդ գումարը մտնում է տնտեսության մեջ և մուլտիպլիկատորի էֆեկտով ազդում ՀՆԱ-ի վրա, նաև` ճյուղային ազդեցություն ունենում: Այս պարագայում արդեն խնդիր ունենք, որ կառավարման համակարգում լուրջ թերացումներ կան, որոնք առարկայական են, և չի հաջողվում վերացնել»,- նշեց նա:

Մեսրոպ Մանուկյանը շեշտեց, որ, սրան գումարած, կառավարությունը հարկային փոփոխություններ է նախաձեռնել, որոնք ևս ծանր սոցիալ-տնտեսական հետևանք են ունենալու հասարակության համար: «Առաջինը գույքահարկն : Նախնական տարբերակով պլանավորվում է բոլոր տեղերում գույքահարկի բարձրացում: Հիմա պատկերացրեք, որ մտավորականի ընտանիքում ծնվածը բնակարան է ժառանգություն ստացել Սայաթ-Նովա փողոցում, բայց ֆինանսական միջոցներ չունի տարեկան 400-500 հազար դրամ գույքահարկ վճարելու, նա մեղավոր չէ, որ այդտեղ բնակարան է ժառանգություն ստացել: Կամ` Մասիվում ապրողը, որը 7000-ի փոխարեն պիտի վճարի 90-100 հազար: Գույքահարկի նման բարձրացումը լրացուցիչ հարկային բեռ է քաղաքացու համար, այն էլ` այն պարագայում, երբ աշխատավարձ չի բարձրացել, երկրում տնտեսական դրական փոփոխություն չի եղել:  Եվ այստեղ պետությունը կատարում է երկրորդ սխալը, այն  է՝ եկամտահարկի համահարթեցում: Առաջին հայացքից սա շատ ճիշտ է, երբ բոլոր 23 տոկոս պիտի վճարեն, բայց բյուջեում 25 մլրդ-ի բաց է առաջանում, որը ենթադրում է լրացուցիչ հարկերի ներդրում. ակցիզային հարկը բարձրանալու է 4 տոկոսով, ինչը դիզվառելիքի, հեղուկ գազի պարագայում գնաճի է բերելու: Երրորդ՝ հասարակության մեջ խորանալու է բևեռեցումը. եթե առաջ շատ աշխատավարձ ստացողը ավելի մեծ հարկեր էր վճարում, ապա հիմա շատ աշխատավարձ ստացողի մոտ դրական մեծ փոփոխություն է տեղի ունենում, որովհետև սկսում է ավելի քիչ հարկ վճարել,  իսկ մեր երկրում գերակշիռ մաս կազմող` մինչև 150.000 աշխատավարձ ստացողի կյանքում դրական ոչինչ չի փոխվում»,-մանրամասնեց Մանուկյանը:

Ըստ նրա` կառավարության այս փոփոխությունները սոցիալական ընդվզման են հանգեցնելու: «Անվստահություն կհայտնի ժողովուրդը, որի միակ պատճառը սոցիալական անարդարությունն է: Այսօր ՀՀ-ում տպավորություն է, որ մենք ապրում ենք Հին Հռոմում, երբ ժողովրդին չեն կարողանում կերակրել, ուստի կազմակերպում են  «գլադիատորական մարտեր»: Իշխանությունը դեռ փորձում է աշխատեցնել սա, այսինքն՝ այն մարդուն, որը նախկինում հասարակության կողմից ընդունված չի եղել, փորձում են «մորթել»՝ դատի տալու, ձերբակալելու տարբերակով: Բայց ես տեսնում եմ, որ ժողովրդի համբերության բաժակը լցվում է, և այն պոտենցիալ լցված կլինի խոր  աշնանը, երբ ժողովրդին քաղաքական քայլերով հնարավոր չի լինի կերակրել»,- ընդգծեց Մանուկյանը:

Վերադառնալով շինարարական ոլորտում թույլ տրված թերացումներին` Զինծառայողների ապահովագրության հիմնադրամի հոգաբարձուների խորհրդի անդամը շեշտեց, որ կառավարության պնդումը, թե 302 կմ ճանապարհ է կառուցվելու, տարվա վերջում իրականությանը չի համապատասխանելու, քանի որ մինչ այսօր բոլոր մրցույթները չէ, որ հայտարարվել են: