Ադրբեջանում կրոնի ուսուցումը պարտադիր կդառնա

Ադրբեջանի իշխանությունները մտադիր են համալսարանական ծրագրի մեջ ներդնել պարտադիր կրոնական կրթությունը:

Ապրիլ ամսվա վերջին Պետական խորհրդի Կրոնական կազմակերպությունների հետ աշխատանքի ղեկավար Մուբարիզ Գուրբանլըն հայտարարել էր, որ սկսած 2020 թ. համալսարանների ուսանողները ունկնդրելու են իսլամին և այլ կրոններին նվիրված դասախոսություններ: Նա նշել է, որ համալսարանական մակարդակով կհանձնվի քննություն, իսկ տարրական և միջնակարգ դասարաններում իսլամին վերաբերող դասեր կմտցվեն. հաղորդում է «Թուրան» գործակալությունը:

Ադրբեջանում, որտեղ շատերը պաշտպանում են երկրի աշխարհիկ կարգերը, այս որոշումը թերահավատորեն են ընդունել:

«Բոլորիս շնորհավորում եմ, մենք մոտեցել ենք Միջնադարին: Դպրոցում կրոնական կրթությունը պարտադիր կդառնա: Ապրենք մենք». – հայտարարել էր Ադրբեջանում հայտնի կոմպոզիտոր և մշակութաբան Էլմիր Միրզոյեվը:

Կրոնական կազմակերպությունների հետ տարվող աշխատանքների կոմիտեն, ի պատասխան դժգոհությունների, նշել է, որ դրանց նպատակը կրոնական ատելության, ծայրահեղության վատ հետևանքների ցուցադրումն է:

Չնայած, որ երկրի 97 տոկոսն իրեն համարում է մուսուլման, այնուհանդերձ քչերն են ակտիվորեն հետևում իսլամական բարքերին: Սակայն ԽՍՀՄ անկումից հետո բնակչության մոտ ակտիվացավ կրոնի հանդեպ հետաքրքրությունը: