Չավուշօղլուն ԻՀԿ-ում անդրադարձել է Ղարաբաղյան հակամարտությանը

Թուրքիայի արտաքին գործերի նախարար Մևլյութ Չավուշօղլուն, մասնակցելով Իսլամական համագործակցություն կազմակերպության գագաթնաժողովին և  խոսելով Թուրքիայի արտաքին մարտահրավերների մասին, անդրադարձել է նաև Ղարաբաղյան հակամարտությանը:

«Ադրբեջանի հողերի 20 տոկոսը բռնազավթված է: Լեռնային Ղարաբաղի հարցը պետք է լուծվի Ադրբեջանի տարածքային ամբողջականության, միջազգային իրավունքի և դրան առնչվող ՄԱԿ-ի որոշումների շրջանակում»,- նրա խոսքերն է մեջբերում trthaber.com կայքը:

Ելույթի ընթացքում Չավուշօղլուն անդրադարձել է նաև Պաղեստինի, Սիրիայի, Լիբիայի, Եմենի և Կիպրոսի խնդրներին:

Նշենք, որ Մեքքայում կայացած գագաթնաժողովում թուրքական պատվիրակությունը ղեկավարում էր Չավուշօղլուն, ներկա չէր Թուրքիայի նախագահ Ռեջեփ Թայիփ Էրդողանը: Էրդողանի բացակայությունը կապում են անցյալ տարի Ստամբուլում սպանված սաուդցի լրագրող Ջեմալ Խաշուկջիի սպանությունից հետո առաջացած` Թուրքիա-Սաուդյան Արաբիա լարվածության հետ: