Զգույշ եղեք, թե չէ` էդ էրեխեքն ասելու են՝ էլի խաբեցին մեզ. Փաշինյանը՝ Սիս գյուղ տանող ճանապարհի բարեկարգման մասին

ՀՀ կառավարությունը մրցույթ կհայտարարի ևս 32 կմ ճանապարհի շինարարության  համար. կառավարության նիստում հայտարարեց  ՀՀ տրանսպորտի, կապի և տեղեկատվական տեխնոլոգիաների նախարարի տեղակալ Բագրատ Բադալյանը՝ տեղեկացնելով, որ 100 կմ ճանապարհ ներկայումս կառուցման փուլում է, իսկ մոտ 97 կմ-ը՝ մրցութային տարբեր փուլերում: 

«Երկուշաբթի հայտարարվել է դեպի Սիս տանող ճանապարհի հիմնանորոգման մրցույթ, որի բացումը կլինի հունիսի 12-ին»,- նաև տեղեկացրեց նա: 

«Մրցույթի բացումը, ոչ թե` ճանապարհի: Զգույշ եղեք, թե չէ` էդ էրեխեքն ասելու են՝ էլի խաբեցին մեզ: Ձևակերպումները պետք է ճշգրիտ լինեն»,- ուղղեց վարչապետ Նիկոլ Փաշինյանը:

Բադալյանն արձագանքեց. «Այո, մրցույթի բացումը տեղի կունենա, որից հետո կմեկնարկեն շինարարական աշխատանքները: Եվս երեք մրցույթ է հայտարարվել Արարատի մարզում,  շինարարությունը կսկսվի հունիսի վերջին: Համոզված եմ, որ մենք մեր նախանշած ցուցանիշներին կհասնենք»:

«Դա շատ կարևոր է: Անկեղծ ասած՝ հաճախ կասկածներ են հնչում` զուտ շինարարության առումով»,- միջամտեց Փաշինյանը:

ՀՀ տրանսպորտի, կապի և տեղեկատվական տեխնոլոգիաների նախարարի տեղակալը վստահեցրեց վարչապետին, որ այս տարի կունենանք ավելի քան 330 կմ ճանապարհահատվածի մասով շինարարական պայմանագրեր: «Կաշխատենք ավելին անել, սակայն նախանշված 330 կմ-ի շինարարությունն  ամբողջությամբ կիրականացնենք»,- ընդգծեց նա:

Փաշինյանը լրացրեց, որ ճանապարհաշինությունը երկու կարևոր նշանակություն ունի. առաջին՝ ենթակառուցվածքների զարգացումը տնտեսությունն է ակտիվացնում, երկրորդ՝ ճանապարհների կառուցումը հոգեբանական նշանակություն ունի և ազդում է երկրում տիրող մթնոլորտի ու մարդկանց տրամադրության վրա:  «Պետք է հնարավորինս արագ հանրապետության ճանապարհները բերենք բարձր մակարդակի»,- ամփոփեց վարչապետը: