Զգույշ եղեք և փոխեք կուրսը. ԱՊԼ գլխավոր քարտուղարի կոչը՝ իրանցի եղբայրներին

Արաբական պետությունների լիգայի գլխավոր քարտուղար Ահմեդ Աբդուլ Գեյթը ՄԱԿ-ի գլխավոր քարտուղար Անտոնիու Գուտերեշի հետ Նյու Յորքում կազմակերպության գլխավոր գրասենյակում հանդիպումից հետո հայտարարություն է տարածել, ըստ որի՝ ինքը լցանավերի միջադեպի հետ կապված ստանում է բավականին հակասական տեղեկություններ, հաղորդում է Associated Press-ը:

«Մեր կարծիքով՝ պատասխանատուն պետք է հստակ հայտնաբերվի: Փաստերը կբացահայտվեն, եւ վստահ եմ, որ դա միայն ժամանակի հարց է»,- ասել է նա:

Գեյթը Իրանին ուղղված կոչով է հանդես եկել` մասնավորապես նշելով. «Իմ կոչը՝ իրանցի եղբայրներին. զգույշ եղեք եւ կուրսը փոխեք, որովհետեւ դուք բոլորին հակազդեցության եք մղում, եւ եթե դա տեղի ունենա, ոչ ոք իրեն անվտանգության մեջ չի զգա»:

Հիշեցնենք, որ հունիսի 13-ին Օմանի ծոցում երկու լցանավերի վրա ենթադրյալ հարձակումից հետո տեղի էին ունեցել պայթյուններ եւ հրդեհներ, տեղի ունեցածի մանրամասները դեռևս պարզվում են։