Մայիսյան եռատոնին ընդառաջ՝ Շուշիի տեխնոլոգիական համալսարանի կազմն այցելել է զորամաս

Շուշիի տեխնոլոգիական համալսարանի մի խումբ ուսանողներ և դասախոսներ մայիսյան եռատոնին ընդառաջ՝ այցելել են Մարտակերտի զորամաս և այնտեղ կազմակերպել մի շարք միջոցառումներ:

«Արցախպրես»-ի  թղթակցի  հետ  զրույցում  Շուշիի  տեխնոլոգիական  համալսարանի   ուսխորհուրդի  նախագահ   Արամ  Հարությունյանն  ասել է, որ  իրենք  երեք տարի  առաջ   Մարտակերտում  հիմնել էին  «Զինվորիս այգին», որտեղ  իրականացրել  են անվանական ծառատունկ՝ ի հիշատակ ապրիլյան պատերազմի նահատակներին:Նրա  խոսքով՝    այցի  շրջանակներում  իրենք  զինվորների  հետ  եղել  են   այդ  այգում, որտեղ  կատարել  են   մի  շարք  աշխատանքներ: Ի  դեպ, այգու   առաջին   ծառն  արդեն  ծաղկել  է,  և    իրենք  պատրաստվում  են  առաջին  բերքը  ստանալու  դեպքում, որպես  խորհրդանիշ, փոխանցել   տվյալ  զինվորի ընտանիքին: 

«Զինվորների   առօրյան  ավելի  հետաքրքիր ու  բովանդակալից  դարձնելու  համար  կազմակերպել  ենք  ինտելեկտուալ   և սպորտային   խաղեր:  Հաղթող  թիմը՝  զինվորներն  արժանացել են  գավաթի: Այս  կերպ   մեր  համալսարանականներով  փորձում  ենք   բանակ-հասարակություն  կապն  էլ  ավելի  ամրապնդել: Մեզ  սատարողները  մեր  զինվորներն  են, որոնք  գիշեր  ու  զօր  հսկում  են, որ    մեր  սահմանները մնան  անառիկ,  և  ապահովում  մեր  անվտանգությունն  ու   խաղաղ առավոտները»,-ավելացրել  է  Ա. Հարությունյանը:

Միջոցառման  վերջում  զինվորներն  իրենց  շնորհակալությունն  են  հայտնել  համալսարանականներին՝  մշտապես  զինվորի   կողքին  լինելու  և   իրենց  ուժ  ու ոգևորություն   տալու  համար: