Դիարբեքիրում անցկացվող թատերական փառատոնում ցուցադրվել է Զապել Եսայանին նվիրված ներկայացում

«Ամեդի» թատերական փառատոնի շրջանակներում Բոսֆորի ցուցադրական արվեստների միությունը Դիարբեքիր քաղաքում բեմադրել է հայ անվանի գրող, արձակագիր, հրապարակախոս և գրականագետ Զապել Եսայանի կյանքին նվիրված «Զապել» ներկայացումը. հաղորդում է mezopotamyaajansi.com կայքը:

«Իրականությունն ազատություն է ծնում» կարգախոսով անցկացվող փառատոնի շրջանակում ցուցադրված ներկայացման հիմքում Զապել Եսայանի «Սիլիհտարի պարտեզները» գիրքն է:

1878 թ. Սկյուտար թաղամասում ծնված Զապել Եսայանի կյանքը ներկայացնող բեմադրությունը պատմում է 1915 թ. ապրիլի 24-ին ձերբակալված հայ մտավորականների ցուցակում ընդգրկվելու և հրաշքով փախուստի դիմելու, աքսորի, երկար տարիներ դեգերելուց հետո Խորհրդային Հայաստան տեղափոխվելու և 1937 թ. ստալինյան բռնաճնշումների հետևանքով ձերբակալվելու պատմությունը: