Զուրաբիշվիլիի այցն ԱՄՆ անհայտ պատճառներով չի կայանա. Rustavi 2

Վրաստանի նախագահ Սալոմե Զուրաբիշվիլիի պաշտոնական այցը ԱՄՆ-ը, որը նախատեսվում էր աշնանը, չի կայանա: Այդ մասին, ըստ ТАСС-ի,  հայտնում է Rustavi 2-ը` իր աղբյուրներին հղումով:

Հեռուստաալիքի տվյալներով` այցը նախապատրաստվում էր մարտից, դրա ուղղությամբ աշխատում էր Վրաստանի ԱԳՆ-ն:

Պաշտոնական մեկնաբանություն այդ առնչությամբ Վրաստանի ԱԳՆ-ն և նախագահի աշխատակազմը դեռ չեն տվել:

Ի դեպ, երեկ Yerkir.am-ը հայտնել էր, որ, ըստ Վրաստանի նախագահի` երկրում ամերիկյան ռազմաբազայի կառուցումը նպատակահարմար չէ, դա կարող է ընկալվել որպես սադրանք: Այդ մասին Սալոմե Զուրաբիշվիլին ասել էր «Ամերիկայի ձայն»-ի վրացական ռադիոկայանին տված հարցազրում:

«Ես խորհուրդ չէի տա անել դա: Երկիրը գտնվում է այնպիսի վայրում, որտեղ անհրաժեշտ է ուժեղացնել անվտանգությունը: Կարիք չկա անել քայլեր, որոնք կարող են ընկալվել որպես սադրանք: Բացի այդ` չեմ կարծում, որ ԱՄՆ-ը պատրաստ է այստեղ ռազմաբազա ունենալ, որը կգրավի ոչ միայն ՌԴ-ի ուշադրությունը, այլև ահաբեկչական շարժումների, որոնք շատ են մեր տարածաշրջանում»,- մասնավորապես ասել է Զուրաբիշվիլին: