Ցյուրիխի թուրքական հյուպատոսության վրա հարձակում են գործել

Շվեյցարիայում Թուրքիայի հյուպատոսության վրա անհայտ անձինք Մոլոտովի կոկտեյլներով հարձակում են գործել: Գլխավոր հյուպատոս Ասիյե Նուրջան Իփեքչին հարձակման վերաբերյալ տարածած հայտարարության մեջ նշել է, որ հարձակումն իրականացվել է գիշերը` ժամը 02.51-ին:

Իփեքչին նաև նշել է, որ նմանատիպ հարձակում նախկինում էլ էր կատարվել, և հավելել, որ ոստիկանությունը դեռևս մանրամասներ չի հաղորդել հարձակում գործած անձանց վերաբերյալ:

Ըստ Euronews-ի թուրքական ծառայության` վերջին 2.5 տարում սա 6-րդ հարձակումն է: 2017 թ. մայիսի 1-ին հյուպատոսարանի դեմ գտնվող ավտոբուսի կանգառում և պատերին մի խումբ դիմակավորված անձինք գրել էին «Kill Erdogan» («Սպանիր Էրդողանին»):