Այս շաբաթվա վերջին վճարելու ենք հերթական պարգևատրումները, դրանք կապված չեն Ապրիլի 7-ի հետ. ՊԵԿ նախագահ

Պետական եկամուտների կոմիտեի աշխատակիցները պարգևատրվել են և շարունակելու են պարգևատրվել: Այս մասին այսօր լրագրողների հետ հանդիպման ժամանակ ասաց ՊԵԿ նախագահ Դավիթ Անանյանը:

«Պարգևատրումներ լինելու են, բայց դրանք կապված չեն Ապրիլի 7-ի հետ, այլ հերթական՝ այս ամսվա պարգևատրումները, վճարելու ենք այս շաբաթվա վերջին, ինչպես որ վճարել ենք հունվարին, փետրվարին: Վճարելու ենք յուրաքանչյուր ամիս, ինչն օրենսդրությամբ մեզ թույլատրվում է»,- ասաց նա:

Հիշեցնենք, որ ամիսներ առաջ մամուլում շրջանառվեց, որ  Պետական եկամուտների կոմիտեում խոշոր պարգևատրումներ են իրականացվել։ Մասնավորապես` ՊԵԿ նախագահ Դավիթ Անանյանը ստացել է 8 մլն 55 000 դրամ, ՊԵԿ նախագահի առաջին տեղակալ Ռաֆիկ Մաշադյանը՝ 9 մլն 60 000 դրամ, ՊԵԿ աշխատազմի ղեկավարի տեղակալ Էդգար Գևորգյանը՝ 6 մլն 456 000 դրամ, ՊԵԿ նախագահի օգնական Էլիզաբեթ Մամիկոնյանը՝ 2 մլն 120 000 դրամ, ՊԵԿ լրատվության պատասխանատու, խոսնակ Լուսինե Մկրտչյանը՝ 2 մլն 30 000 դրամ և այլն: