Ամերիկա, հաշվի առ սա` ինչո՞ւ մեր պաշտոնյաները չեն կարող հանրային անվտանգությունը զենք արտադրողների շահույթից բարձր դասել. Քիմ Քարդաշյան

Ամերիկահայ հեռուստաաստղ Քիմ Քարդաշյանը ողջունել է Նոր Զելանդիայի իշխանությունների՝ զենքի գնման և պահման օրենքները լիովին փոխելու որոշումը: Այս մասին հայտնում է Daily Mail-ը:

Նորզելանդական իշխանություններն այս որոշումը կայացրել են օրերս` Քրայսթչըրչ քաղաքի երկու մզկիթներում տեղի ունեցած հարձակումից հետո, որը խլել էր ավելի քան 50 մարդու կյանք:

«Քրայսթչըրչում կատարված հրաձգությունից 24 ժամ անց Նոր Զելանդիան արգելում է կիսաավտոմատ հրացանները: Ամերիկա', հաշվի առ սա` ինչո՞ւ մեր կողմից ընտրված պաշտոնյաները չեն կարող հանրային անվտանգությունը զենք արտադրողների շահույթից բարձր դասել»,- գրել է Քարդաշյանը` ի պատասխան Նոր Զելանդիայի գլխավոր դատախազ Դեյվիդ Պարկերի հակասական մեկնաբանությանը:

Հիշեցնենք, որ տեղի ունեցած հարձակումից հետո Նոր Զելանդիայի վարչապետ Ջասինդա Արդերնը խոստացել էր փոխել զենքի գնման և պահման օրենքները, իսկ գլխավոր դատախազը`արգելել կիսաավտոմատ հրացանների օգտագործումը: