Քաղաքապետարանն ապամոնտաժում է օպերայի թատրոնի հարակից տարածքի սրճարանները

Երևանի քաղաքապետարանը սկսել է ապամոնտաժել օպերայի թատրոնի հարակից տարածքի սրճարանները: Մի քանիսի գույքն արդեն դուրս են հանել:

Սեփականատերերից ու քաղաքապետարանի աշխատակիցներից բացի, տեղում են նաեւ Կենտրոն վարչական շրջանի թաղապետ Վիկտոր Մնացականյանը եւ մեծ թվով ոստիկաններ:

Սրճարանների սեփականատերերն ու աշխատողները վրդովված են, ասում են՝ քաղաքապետարանի գործողություններն անօրինական են: Նրանք պնդում են, որ պայմանագրային պարտավորությունները դադարեցնելու հիմք չկա, իսկ դրանք վաղաժամ դադարեցնելու դեպքում քաղաքապետարանը պետք է փոխհատուցում տրամադրի: Սրճարաններից մեկի մենեջերը լրագրողների հետ զրույցում նշեց` սրճարանների ապամոնտաժման հետեւանքով գործազուրկ է մնում շուրջ 300 մարդ։

Երևանի քաղաքապետարանի աշխատակազմի բնապահպանության վարչության պետ Խաչիկ Հակոբյանը լրագրողների հետ զրույցում հայտնեց, որ թատրոնի տարածքը վերականգնվելու է դրան բնորոշ կերպարով՝ սիզամարգերով և համապատասխան ծառերով, աշխատանքները շուտով կմեկնարկեն։

Հիշեցնենք, որ Ազատության հրապարակին հարող հատվածում քաղաքի սեփականությունը հանդիսացող հողամասեր վարձակալած և սրճարանային բիզնես ծավալած տնտեսվարողները քաղաքապետարանի համապատասխան ստորաբաժանումից տարվա սկզբին ծանուցում էին  ստացել, որով առաջարկվում էր նրանց հրաժարվել վարձակալության իրավունքով տրամադրված հողամասերի մի մասից: