Ընտրությունների գնացող թուրքական քաղաքական էլիտան ցավակցում է Պոլսո հայ համայնքին

Երեկ 62 տարեկան հասակում երկարատև հիվանդությունից հետո իր մահկանացուն կնքեց Պոլսո 84-րդ պատրիարք Մեսրոպ արքեպիսկոպոս Մութաֆյանը: Այս կապակցությամբ տեղի հայ համայնքը շարունակաբար ցավակցական նամակներ է ստանում տարբեր հասարակական-քաղաքական կազմակերպություններից, գործիչներից:

Երեկ նախագահ Ռեջեփ Թայիփ Էրդողանը թվիթերյան էջում հայերենով իր ցավակցությունն է հայտնել հայ համայնքին: Նրան են հետևել նրա կուսակից, նախկին վարչապետ և ԹԱՄԺ նախագահ, Ստամբուլի քաղաքապետի թեկնածու Բինալի Յըլդըրըմը, գլխավոր ընդդիմադիր Հանրապետական-ժողովրդական կուսակցության նախագահ Քեմալ Քըլըչդարօղլուն, նույն կուսակցության` Ստամբուլի քաղաքապետի թեկնածու Էքրեմ Իմամօղլուն, ընդդիմադիր «Լավ» կուսակցության (İYİ Parti) նախագահ Մերալ Աքշեները, քրդամետ Ժողովուրդների դեմոկրատական կուսակցությունը և այլ քաղաքական ուժեր և  գործիչներ:

Նշենք, որ մարտի 31-ին Թուրքիայում սպասվում են ՏԻՄ ընտրություններ: