Վիզայի ազատականացման մասին երկխոսություն սկսելը քաղաքական որոշում է, վերջնական խոսքը ԵՄ անդամ պետություններինն է. Սվիտալսկի

Վիզայի ազատականացման մասին երկխոսություն սկսելը քաղաքական որոշում է, և վերջնական խոսքը պետք է ասեն ԵՄ անդամ պետությունները: Այս մասին լրագրողների հետ հանդիպման ժամանակ ասաց  Հայաստանում ԵՄ պատվիրակության ղեկավար, դեսպան Պյոտր Սվիտալսկին՝ պատասխանելով վիզայի ազատականացման շուրջ բանակցությունների մեկնարկի մասին հարցին:

«Սա ունի նաև գործնական կողմ, և այստեղ կան հարցադրումներ, որոնք կապված են վիզայի դյուրացման ռեժիմի իրականացման հետ, այսինքն՝ ինչպես են իրականացվում հայաստանցիների այցերը եվրոպական երկրներ»,- նշեց Պյոտր Սվիտալսկին՝ հավելելով, որ շատ անկեղծ երկխոսություն են ունեցել հայկական կողմի հետ, և հայկական կողմը շատ հստակ գիտի, թե ինչպիսի մտահոգություններ ունեն ԵՄ առանձին անդամներ, ու գիտակցում է այդ մտահոգություններին արձագանքելու անհրաժեշտությունը:

«Հետևաբար՝ չեմ կարող կոնկրետ ժամկետ և ամսաթիվ ասել: Մենք ուղղորդվում ենք քաղաքական հայտարարությամբ, որն արտացոլված է Համապարփակ և ընդլայնված համաձայնագրում, որ վիզայի ազատականացման երկխոսությունը  հնարավոր է, եթե լավ կառավարվող և անվտանգ տեղաշարժի ապահովման երաշխիքներ ու մեխանիզմներ կան: Եկեք լավատես լինենք, որ այս պայմանները կապահովվեն»,- հավելեց դեսպանը: