Առանց ԸՕ-ի փոփոխության` քաղաքական դաշտի առողջացումը չեմ պատկերացնում. Լենա Նազարյան

ՀՀ ԱԺ փոխնախագահ Լենա Նազարյանը խորհրդարանական ճեպազրույցների ժամին, անդրադառնալով ՀԱԿ-ի` սահմանադրական հանրաքվե անելու և կիսանախագահական կառավարման համակարգի անցնելու հարցին, ասաց, որ սահմանադրական բարեփոխումների հարցն իրենց օրակարգում է, բայց պետության կառավարման մոդելի հետ կապված դեռ քննարկումներ չեն ունեցել:

«Պատեհ պահի կքննարկենք նաև այդ առաջարկը»,- ասաց նա` չհստակեցնելով այդ հարցի վերաբերյալ սեփական դիրքորոշումը:

Լրագրողների հարցին, թե ՀԱԿ-ը հեղափոխության օրերից աջակցել է Նիկոլ Փաշինյանին, ի՞նչ է փոխվել հիմա, որ նման բան է առաջարկում, արդյո՞ք կա վստահության անկում վարչապետի նկատմամբ, Նազարյանը բացասական պատասխան: «Պարզապես նրանք իրենց քաղաքական օրակարգն ունեն և ներկայացնում են այն: Որևէ ենթատեքստ չեմ տեսնում»,- հավելեց նա:

Նազարյանը նշեց, որ թեև սահմանադրական փոփոխությունների մասին այս պահին բան չի կարող ասել, բայց հստակ է, որ Ընտրական օրենսգրքի փոփոխությունները լինելու են Ազգային ժողովի ուշադրության կենտրոնում ու փոփոխվելու են: Նա շեշտեց, որ, առանց դրա, չի պատկերացնում քաղաքական դաշտի առողջացումը: